O Concello de Santiago fomentará "a crianza en galego" a través do Programa Apego

O Concello de Santiago relanzou o programa 'Apego', unha iniciativa que pretende crear "espazos de socialización" nos que se "fomente a crianza en galego" desde as primeiras idades, segundo explicou a alcaldesa da cidade, Goretti Sanmartín.

As persoas que queiran asistir ás actividades propostas, que son totalmente gratuítas e que empezan este mesmo luns, terán que, ademais de inscribirse no programa, cubrir o formulario que se lles envíe ao correo electrónico, tal como explicou a técnica do Departamento de Lingua, Marta Besada, este venres en rolda de prensa. O programa, que se iniciou en 2015, está orientado aos nenos de entre 0 e 6 anos e ás súas familias. Actualmente está presente en 16 concellos e, no caso de Santiago, conta con 675 familias inscritas desde os seus inicios; preto de 30 familias no último ano.

A rexedora animou ás familias que "queiran que o galego forme parte da súa vida" a adherirse ao programa a través da web ou do Departamento de Lingua Galega e lembrou que coa inscrición "recibirán como regalo unha caixa de benvida" con materiais diversos para fomentar a crianza en galego.

ACTIVIDADES SEMANAIS

As actividades realizaranse de luns a mércores todas as semanas, así como os xoves cada 15 días. O luns está enfocado a situacións da vida a través de xogos, para así traballar a sicomotricidade e experimentar coa ciencia, entre outros obxectivos.

Os martes están destinados aos contacontos, un "clásico" nos últimos dous anos segundo Marta Besada que, neste mes de marzo, dedicarase á igualdade. Tamén haberá xogos no mércores que, do mesmo xeito que o resto de días, divídense por tramos de idades.

Un xoves cada quince días ofreceranse espectáculos en diferentes formatos. Algúns dos concretados son 'Saaabor!' de Félix Rodríguez e Fran Rei, previsto para o xoves 7; ou 'Este queixo queixolán' de Pavís Pavós, que será o xoves 21, ambos no Espazo Apego.