A Xunta coloca trampas xeolocalizadas contra as velutinas onde se atoparon niños en anos anteriores

A Xunta iniciou a colocación de novas trampas para frear a expansión das avespas velutinas en diferentes municipios galegos, co obxectivo principal de capturar as avespas reina, que a principios de primavera saen en procura de alimento para construír os primeiros niños. Así, os dispositivos de captura están a instalarse nas mesmas localizacións nas que se detectaron niños de velutina en anos anteriores.

Os dispositivos de captura, que se están colocando nestes días, foron encomendados por quinto ano consecutivo á Empresa Pública de Servizos Agrarios Galegos (Seaga). Así mesmo, recibirán a colaboración de axentes ambientais e bombeiros forestais da Consellería do Medio Rural. Este é o primeiro ano que se establece un plan de actuación homoxéneo para todos os municipios galegos.

Esta forma de captura permite o seguimento e estudo a través da recollida de datos na aplicación 'Contravelutina', a través da cal a cidadanía tamén pode alertar de novos niños. Ademais de adiantar a retirada de niños de pequeno tamaño, este ano o Goberno galego incidirá na formación, información e divulgación entre todos os efectivos que traballan en frear a expansión da especie, así como entre os profesionais afectados e o resto da cidadanía.

Segundo comunica Medio Rural, tamén se "impulsará a investigación científica para coñecer en maior profundidade o comportamento da velutina e así poder determinar o método máis efectivo para evitar a súa propagación". Entre os métodos de notificación, ademais da aplicación móbil, quen localice algún niño pode alertar da súa presenza a través do número de teléfono 012. Posteriormente será informado. 

TODOS OS CONCELLOS NO PLAN CONTRA COA VELUTINA

No comunicado, a Consellería tamén informou da renovación por quinto ano consecutivo do encargo á empresa pública Seaga para a execución do Programa galego de vixilancia e control fronte a avespa velutina, acordado no 2020 entre a Xunta e a Federación Galega de Municipios e Provincias (Fegamp) e que, como novidade, este ano conta coa adhesión por vez primeira da totalidade dos 313 concellos galegos.

Indican que con este acordo ofrécese unha solución "homoxénea, centralizada e coordinada" cos concellos para a eliminación e retirada de niños desta especie a través do equipo de Seaga, reforzado pola Xunta coa dotación de material e medios necesarios para esta actividade -- desde pértegas e equipos de protección individual ata material informático --, ademais de contar coa formación específica necesaria.

A este respecto, informan de que a poboación pode notificar na liña específica do Teléfono de Atención e Información á Cidadanía 012 (operativa as 24 horas do día e os 365 días do ano) a detección dun niño de velutinas ou alertar da súa presenza, sendo posteriormente informadas a través dun servizo de comunicación vía SMS da resolución do aviso por parte da Xunta.