O Sergas reivindica as condicións económicas e laborais que ofrece aos MIR para que se formen en Galicia

O Servizo Galego de Saúde reivindicou as condicións económicas e laborais que ofrece Galicia aos médicos internos residentes (MIR), co que os anima a traballar nos centros públicos galegos. 

Tal e como sinalan nun comunicado, a nivel retributivo o persoal residente en formación en Galicia conta cunhas condicións que oscilan entre os 36.000 euros dos MIR 1 ata os 51.000 euros do persoal médico en formación R5 (inclúe catro gardas en días laborais e unha garda de fin de semana).

No que respecta ás xornadas ordinarias, compútanse un total de 1.575 horas ao ano e, apuntan, remunérase de forma adicional o traballo realizado nas quendas do sábado pola mañá. En canto a este punto, destacan que as libranzas das gardas están "garantidas", tamén as dos sábados.

Remarcan tamén que actualmente teñen activas "importantes políticas de emprego", entre as que destaca a oferta de contratos específicos para persoal residente que termina a súa formación, coa posibilidade de asinar un contrato que se estenderá durante tres anos -- como ocorre no caso das especialidades de Medicina Familiar e Comunitaria ou de Pediatría de Primaria --.

POLÍTICAS DE CONCILIACIÓN

No comunicado subliñan tamén que, dada a alta presenza de mulleres no ámbito da formación sanitaria especializada, o Sergas conta con medidas dirixidas a mellorar o seu benestar, como as 23 medidas destinadas ás mulleres embarazadas traballadoras, "que ademais non sufrirán ningunha perda retributiva".

A todo isto suman as gardarías dispoñibles en varios hospitais, así como as prazas de aparcadoiro específicas ou condicións especiais de adaptación, entre outras. Por último, indican que o servizo conta con máis de 950 titores "altamente cualificados e cunha ampla experiencia", que acompañarán ao MIR nas diferentes especialidades clínicas.