ERC impón a súa posición e Miranda deixará o escano "ao final" da lexislatura para cederllo aos cataláns
A galega pasará a ser asesora cando o seu asento recaia no meteorólogo Tomás Molina,
Por Europa Press / Redacción | SANTIAGO DE COMPOSTELA | 10/06/2024 | Actualizada ás 21:56
O BNG admitiu que o escano logrado por Ana Miranda como número tres da candidatura de coalición Agora Repúblicas pasará a mans de Tomás Molina, cuarto na lista en representación de ERC, "ao final" da lexislatura, aínda que non precisou cando, algo que ligan a unha negociación cos republicanos unha vez se coñezan os resultados definitivos contabilizado xa o voto CERA.
Este luns, xornada posterior á noite na que o BNG celebrou o "escano propio" na Eurocámara e despois de que ERC trasladase en Cataluña que o terceiro asento logrado pola coalición soberanista sería rotatorio, fontes do Bloque confirmaron aos medios de comunicación que Miranda non completará a lexislatura como eurodeputada.
En todo caso, o BNG non aclarou en que momento dos cinco anos de lexislatura en Bruxelas pasará a mans do meterólogo de TV3 Tomás Molina a acta que asumirá Miranda a mediados de xullo cando se constitúa a Eurocámara cunha sesión que se celebrará entre o día 16 e o 19.
O cálculo realizarase con base á achega cuantitativa de sufraxios que cada pata da coalición (ERC, EH Bildu, BNG e Ara Més). Os votos en todo o Estado foron 856.500, coa seguinte repartición: 354.247 de ERC (-6,40%), 227.973 de Bildu (+4,23) e 179.905 de BNG (+4,33%).
Apuntan que a repartición do tempo de goce do escano foi unha "práctica habitual" na coalición que BNG, EH Bildu e ERC comparten nas últimas edicións das eleccións europeas e valoran que Miranda fose "escollida de forma directa como eurodeputada" na noite electoral, o que lle permitirá elixir as comisións nas que formar parte.
O Bloque, que defende ser a forza que "máis crece" dentro da coalición, aclara que o seu escano só será compartido unicamente con Esquerra e que Miranda continuará co seu traballo na Eurocámara unha vez abandone a súa condición de eurodeputada.
PONTÓN RECOÑECEU "AXUSTES"
Na mañá deste luns, a portavoz nacional do BNG, Ana Pontón, recoñeceu que habería "axustes" no tempo que terá o Bloque o escano da coalición Agora Repúblicas alcanzado por Ana Miranda na UE, aínda que garante que a eurodeputada "vai estar cinco anos en Europa".
Na noite do domingo, a propia candidata de ERC ás eleccións europeas, Diana Riba, asegurou que "antes que se acabe este mandato, Tomàs Molina será eurodeputado", en referencia ao número 4 da lista da coalición.
