Nota.- CC.OO. tilda de "clientelar" a selección do persoal do Consorcio Galego de Benestar

CCOO responsabiliza da aprobación e publicación destas bases, a actitude intransixente dos representantes do Consorcio e o colaboracionismo do seu brazo sindical, que impuxeron, na mesa de negociación, unhas bases que carecen das mínimas garantías de obxectividade e transparencia a mais de que non contan coa participación dos representantes dos traballadores/as nas comisións de selección.

Este proceso selectivo, QUE NON CONTOU CO APOIO DE CCOO, nace xa viciado en orixe e crea un clima laboral negativo nos centros de traballo para os mais de 300 traballadores/as actualmente contratados que ven perigar a súa continuidade na empresa por quedar, coa complicidade da CIG, a súa estabilidade laboral supeditada á aplicación de criterios subxectivos e ós caprichos que decidan impoñer os dirixentes do consorcio na resolución deste proceso selectivo.

CCOO na Mesa de Negociación, co obxecto de favorecer que este proceso selectivo fose o mais favorable para a maioría (a poder ser para a totalidade) dos traballadores/as, plantexou que si querían contar co seu apoio, deberían recollerse nun acordo as seguintes condicións mínimas:

Que as bases do proceso selectivo, recollesen garantías de transparencia e obxectividade (exames tipo test, nota de corte, concreción dos temarios, etc.).

Que nas comisións de valoración dos distintos procesos houbese representación sindical plural (mínimo dous representantes sindicais).

Que a OPE-2008, na primeira fase, recollese só a relación de prazas correspondentes ós contratos realizados no 2007.

Que no acordo se relacionase a totalidade das prazas restantes a incluír nunha segunda fase, aplicándolle os mesmos criterios de transparencia, obxectividade e participación sindical, que os procesos selectivos da primeira fase.

Lamentablemente ningunha destas condicións foron aceptadas, preferindo os representantes do Consorcio, co apoio da CIG, seguir adiante con un proceso de selección, enganoso, fraudulento e sen participación sindical plural, pondo en risco a consolidación de emprego do persoal actualmente contratado.

Con esta decisión quedou constatado, unha vez mais, que o BNG, onde goberna, prefire os "chiringuitos clientelares" e a exclusión das opcións sindicais "molestas", en vez de construír acordos, desde o respecto á pluralidade sindical, que garantan a estabilidade laboral dos traballadores/as actualmente contratados".