A Xunta pon en "dúbida" que a Autovía Santiago-Lugo poida terminarse antes de que acabe o ano
Por E.P. | SANTIAGO DE COMPOSTELA | 09/10/2025 | Actualizada ás 17:24
A conselleira de Vivenda e Planificación de Infraestruturas, María M. Allegue, puxo en "dúbida" que a autovía A-54, que une Santiago con Lugo, estea terminada antes de que acabe 2025. "Pomos en dúbida, polo avance das obras, que a apertura deste tramo se materialice este ano", afirmou sobre o tramo pendente de apertura entre Arzúa e Melide, en alusión ás declaracións do mércores do presidente Pedro Sánchez, que a daba por finalizada.
Así se expresou este xoves en Lugo, durante a presentación do proxecto recuperación da contorna do Pazo de Doa Urraca. Allegue lembrou que se trata dunha infraestrutura que leva 16 anos en execución e que urxe a súa finalización, xa que é unha nacional moi transitada que forma parte do Camiño de Santiago. "Esperemos que o Ministerio cumpra os seus obxectivos", conclúe a conselleira, que lembra que ten solicitada unha reunión co ministro Óscar Puente para falar de infraestruturas: "Da A-54, pero doutras tamén moi importantes, como o rescate que estamos a pedir da AP-9".
