Feijóo aproveita a súa viaxe a Arxentina para falar das eleccións
O presidente galego defende que se reforme o sistema de voto na diáspora e aposta por un sistema de voto electrónico.
Por Galicia Confidencial | Bos Aires | 22/04/2016 | Actualizada ás 13:43
O presidente da Xunta de Galicia, Alberto Núñez Feijóo, aproveitou a visita que está realizando a Arxentina para falar das eleccións e do sistema electoral e apostou por "reformular o sistema" do voto de residentes no exterior para garantir que todos os españois poidan exercer o seu dereito.
"Con esta lei non é posible exercer o dereito a voto e en consecuencia habemos de modificar a lei porque non é útil" e así non se pode seguir”, dixo Feijóo en declaracións aos xornalistas tras o acto inaugural da Feira Internacional do Libro de Buenos Aires.
“É evidente que non hai prazo suficiente para poder exercer o dereito a voto e que os galegos que queren votar teñen moitas dificultades. Non pola súa actitude, senón simplemente porque os prazos son moi pequenos”, dixo en alusión ás últimas eleccións xerais de 2015, cando só un 5 % dos galegos residentes no exterior puideron emitir o seu voto de maneira efectiva.
Por iso, abrir os prazos de presentación de papeletas, establecer o voto electrónico e converter embaixadas e consulados en centros de votación, son algunhas das solucións que propón o presidente galego. "Todo o sistema de voto solucionaríase co voto electrónico", reiterou.
Núñez Feijóo lembrou que o Parlamento galego logrou pactar "por unanimidade" unha proposta para modificar a lei de voto rogado, aínda que apuntou que mentres non se constitúa un Goberno de pleno dereito en España vai ser moi difícil que ese proxecto de lei entre en vigor para as eleccións galegas" que se celebrarán a finais de 2016.
