Verín contra a violencia machista: "Se tocan a unha, tócannos a todas"
"Non é un problema individual, senón estrutural. Necesitamos respostas firmes e conxuntas desde todos os ámbitos: institucional, social e cidadán", subliñou a concelleira de Servizos Sociais, Rosario Rodríguez
- "Non se teme pola vida" da muller que foi disparada polo seu home en Verín
- Detido o home que disparou varias veces a súa parella en Verín nun presunto caso de violencia machista
Por Europa Press / Redacción | SANTIAGO DE COMPOSTELA | 27/05/2025 | Actualizada ás 18:28
A Praza do Concello de Verín, en Ourense, foi este luns escenario dunha concentración multitudinaria de repulsa tras o intento de feminicidio rexistrado o pasado fin de semana no municipio, onde unha muller resultou ferida de gravidade tras recibir varios disparos, presuntamente a mans da súa parella.
Baixo a lema "Se tocan a unha, tócannos a todas", representantes institucionais, asociacións, entidades sociais e veciños mostraron o seu unánime rexeitamento ante o que cualifican como un novo episodio de violencia machista.
Durante o acto, a concelleira de Servizos Sociais, Rosario Rodríguez, deu lectura a un manifesto institucional en nome do Concello de Verín no que se expresou a "máis rotunda condena" ante este crime machista e o apoio incondicional á vítima e a súa contorna. "Non é un problema individual, senón estrutural. Necesitamos respostas firmes e conxuntas desde todos os ámbitos: institucional, social e cidadán", subliñou.
A concentración foi organizada polo CIM da Mancomunidade de Municipios de Verín, FEMURO, CDR Portas Abertas e Cruz Vermella, entre outras entidades comprometidas coa igualdade e a erradicación da violencia de xénero. Todas elas reclamaron continuar traballando desde a prevención, a educación e a atención directa ás vítimas.
O PSOE ESIXE TOLERANCIA CERO
Por outra banda, nun comunicado emitido este luns, o PSOE provincial de Ourense expresou a súa "consternación" non só polos feitos de Verín, senón por unha preocupante sucesión de casos recentes na provincia.
No documento, os socialistas lembran que en apenas dous meses producíronse en Ourense un asasinato machista no Bolo, un intento de homicidio no Barco de Valdeorras e agora este novo caso en Verín, cunha vítima hospitalizada tras recibir dous impactos de bala.
Desde a formación advirten que non se pode normalizar nin silenciar esta violencia sistemática contra os dereitos das mulleres.
O PSOE chama á denuncia activa de calquera caso de violencia de xénero e lembra que actualmente hai 532 casos activos rexistrados no sistema VioGén na provincia. "Combater esta secuela debe ser unha prioridade de todas as institucións, máis aló de ideoloxías ou cores políticas", subliña o partido.
