O TSXG dálle a razón a unha enfermeira do HULA polo permiso de lactación completo
A Xustiza galega recoñece as 150 horas de lactación e anula a redución aplicada polo Sergas, ao considerala contraria ao dereito á conciliación.
Por Europa Press / Redacción | Santiago de Compostela | 04/08/2025 | Actualizada ás 12:00
O Tribunal Superior de Xustiza de Galicia (TSXG) recoñeceu o dereito dunha enfermeira do Hospital Universitario Lucus Augusti (HULA) a gozar das 150 horas de permiso acumulado de lactación, anulando así a resolución do Servizo Galego de Saúde (Sergas) que lle concedera só 95 horas. O alto tribunal considera compatible o goce completo deste permiso coa posterior solicitude de excedencia para o coidado dun fillo menor.
Na sentenza, a sección primeira da Sala do Contencioso-Administrativo rexeita o criterio da Xunta, que reducira o número de horas ao entender que non se prestaran todos os servizos efectivos debido á excedencia. A administración alegaba que as horas debían minorarse proporcionalmente ao tempo traballado.
Porén, o TSXG defende que o permiso de lactación se xera pola mera existencia dun fillo menor de doce meses e non en función do tempo efectivamente traballado. Sinala que a súa natureza é permitir ao traballador/a ausentarse do seu posto para atender ao menor, ben sexa nunha hora diaria ou acumulando o tempo en xornadas completas.
A Sala considera que restrinxir este dereito vulnera os principios de conciliación da vida laboral e familiar e a protección da infancia. Por iso, conclúe que reducir as horas do permiso por terse solicitado unha excedencia posterior é contrario ao dereito, aínda que a sentenza non é firme e pode ser recorrida ante o Tribunal Supremo.
