O envorco dun camión cisterna que transportaba leite obriga a cortar a N-640 en Lalín
O condutor do vehículo non presentaba lesións, pero, co paso do tempo, comezou a queixarse de dor, polo que tamén foi activado o 061 para a súa atención.
Por Europa Press / Redacción | SANTIAGO DE COMPOSTELA | 07/08/2025 | Actualizada ás 20:55
Un camión envorcou esta tarde de xoves no municipio pontevedrés de Lalín, o que obrigou a cortar por completo a estrada N-640, ao seu paso pola parroquia da Veiga, no quilómetro 160 aproximadamente. Foi un particular quen alertou ao 112 Galicia ás 16.10 horas, na que indicaba que un camión cisterna que transportaba leite acababa de envorcar, polo que obstaculizaba por completo a circulación na vía.
O 112 Galicia mobilizou aos Bombeiros de Silleda, ao GES de Lalín, á Garda Civil de Tráfico, á Policía Local e aos efectivos de Protección Civil. Unha vez no punto, os servizos de emerxencia confirmaron que a vía permanecía totalmente cortada, polo que se habilitou un desvío alternativo para garantir a seguridade e a fluidez do tráfico. Inicialmente, o condutor do vehículo non presentaba lesións, pero, co paso do tempo, comezou a queixarse de dor, polo que tamén foi activado o 061 para a súa atención.
