O popular Jesús Reboredo, novo alcalde de Touro co apoio dun edil tránsfuga: “traidor”

O popular Jesús Reboredo foi elixido alcalde da localidade coruñesa de Touro tras prosperar a moción de censura contra Roberto Castro (Movemento Veciñal) na que contou co apoio de Darío Rei, exconcelleiro do partido do rexedor e que, entre as súas demandas para apoiar o cambio de executivo, esixía que o Concello se persone nos procesos xudiciais que incumban a mina de Touro-O Pino. O novo alcalde defendeu que esta moción é un exercicio de "responsabilidade" tras a reprobación de Castro no pleno de xullo. Agora, asegurou, pretende constituír un goberno de "emerxencia" ante a "incapacidade de dialogar" e a "falta de iniciativas" do goberno local.

A continuación, durante a intervención de Castro, o edil non adscrito abandonou o pleno (ao que regresou tras concluír esta quenda de palabra). O alcalde saínte pediu desculpas ao concelleiro do Partido Galego e ao movemento veciñal por incluír nas listas a "unha persoa que resultou politicamente indesexable" e á que acusou de ter "intereses económicos persoais". Esta moción chega -- tras as de Forcarei e Noia-- grazas á sentenza do Tribunal Constitucional de mediados de xuño que elimina un parágrafo da lei electoral que recollía que, se a proposta presentábase cun tránsfuga, a maioría absoluta requirida ampliábase.

A OPOSICIÓN DO PP Á MINA, "PURO DELIRIO"

Pola súa banda, o concelleiro do BNG, Xoán Antón Louzao, que votou en contra da moción, defendeu o papel do Bloque no consistorio tourense "sendo fiel aos seus principios", a pesar de que recoñeceu que o Goberno local "dilapidou as ilusións e esperanzas que se abriron" tras os anos de mandato do PP na localidade. Nesta liña, explicou que se abstivo na reprobación ao alcalde porque, aínda que "había razóns", a alternativa é "un goberno do PP".

"Só digo que cando alguén goberna como un César, o que nunca pode sorprender é que che salga un Décimo Julio Bruto. Iso xa o explicou a historia; iso é o que pasou e o que nos trae hoxe aquí", exemplificou. Ademais, respecto da mina, Louzao apuntou que "ninguén se cre que o PP vaia a cambiar a súa postura", recoñecendo que o actual goberno "púxose de perfil". "Pero o PP púxose detrás empuxando", criticou antes de insistir en que "pensar que o PP" se vai a opor á mina é "puro delirio".

BERROS DE "TRAIDOR" A REY

Durante a sesión, nin o edil do Partido Galego nin Darío Rey fixeron uso da súa quenda de palabra. Unha vez concluído o pleno e tras xurar Jesús Reboredo o cargo, os concelleiros do Movemento Veciñal abandonaron o salón de plenos, mentres que os populares quedaron uns instantes a dar o seu apoio ao xa novo alcalde. Entre os presentes este luns en Touro atopábanse rexedores do PP da zona como o alcalde do Pino, Manuel Taboada, o de Sigüeiro, Álex Doval, o de Boqueixón, Ovidio Rodeiro, entre outros.

Á saída, do Concello escoitáronse algúns aplausos, pero tamén berros de "traidor" ao concelleiro tránsfuga que, a pesar de que non quixo intervir no pleno, si atendeu aos medios de comunicación para defender que o vivido este martes "vén de atrás", sostendo que el "ten personalidade" e "ningún tipo de interese". "Estou aquí porque onde dixen unha cousa, hoxe non digo outra", argumentou. Sobre a polémica pola mina, Darío Rey reprochou que haxa quen "tente dar leccións", acusando o goberno de Movemento Veciñal de Touro de non recorrer o acordo do Consello da Xunta de declarar o proxecto da mina como estratéxico.

Neste sentido, tamén propuxo que o Concello se persone nesta cuestión ao estar "directamente implicado", pero o alcalde, dixo, "negouse a que se personasen nas causas". Por todo iso, aseverou que o acordo co PP "non é ambiguo" respecto da mina e augurou: "O tempo falará".