Sumar pide responsabilidade ás empresas para suspender xornadas laborais se é preciso polos incendios

O secretario xeral de Movemento Sumar Galicia, Paulo Carlos López, ante a gravidade dos incendios que afectan a Galicia, en especial á provincia de Ourense, trasladou a "solidariedade" da organización con todas as persoas afectadas e a súa "forza" para quen están a loitar contra os lumes. 

A continuación, advertiu de que agora toca "colaboración entre administracións" e "non pór en risco vidas, estando atentos a posibles evacuacións pola proximidade do lume a algúns núcleos de poboación". Neste sentido, López apela á responsabilidade das empresas para "suspender xornadas de traballo se así se require" dada a proximidade dalgún dos lumes a polígonos e centros de traballo, xa que, "o lume e o fume son incontrolables, podendo ter consecuencias para a saúde e para a seguridade".

Igualmente, Sumar Galicia pensa que a colaboración "é urxente" entre administracións, "sen fisuras entre concellos, deputacións, Delegación do Goberno, Xunta e Goberno central, non existindo nin un mínimo espazo para a improvisación nin para a confrontación política", xa que a prioridade debe ser "coordinar todos os recursos humanos e materiais dispoñibles" para "salvar vidas, protexer ás persoas e defender o territorio". Sumar Galicia mostra a súa máis fonda gratitude a brigadistas, bombeiros, persoal de emerxencias, protección civil e as forzas de seguridade polo seu traballo.