Última hora: Recibe a alta un dos brigadistas feridos no incendio de Oímbra

Un dos brigadistas feridos no incendio de Oímbra (Ourense), de 23 anos, recibiu o alta hospitalaria, cunha evolución favorable. Mentres, os outros dous e un bombeiro ferido noutro lume seguen ingresados na Unidade de Queimados no Complexo Hospitalario da Coruña (Chuac), un deles con prognóstico moi grave, aínda que o tres están estables.

Segundo o último parte médico facilitado polo centro hospitalario, o brigadista que recibiu a alta conta con queimaduras de segundo grao e afectación ao 15% do seu corpo. Presentaba unha intoxicación por inhalación de fume, xa resolta, e evoluciona favorablemente. Os outros dous brigadistas de Oímbra seguen ingresados no Chuac. No caso do máis novo, de 18 anos, ten queimaduras de terceiro grao con afectación no 40% do seu corpo. Presenta intoxicación por inhalación de fume e está estable con prognóstico moi grave.

Polo seu lado, o brigadista de 26 anos ten queimaduras de segundo grao con afectación no 15% do seu corpo. Presentaba intoxicación por inhalación de fume, xa resolta, e está estable con prognóstico grave. O bombeiro de 46 anos ferido o pasado luns, 18 de agosto, continúa na Unidade de Queimados do Chuac con queimaduras de segundo grao e afectación ao 10% do seu corpo. A intoxicación por inhalación de fume foi igualmente resolta no seu caso. Está estable con prognóstico grave.

INCENDIO EN AVIÓN

O último dos incendios forestais rexistrados en Galicia, iniciado en avión ás 17.09 do domingo, queima unha superficie estimada de 70 hectáreas na parroquia de Nieva. Actualmente, son tres os incendios activos en Galicia, todos eles na provincia de Ourense, que permance desde fai case unha quincena no nivel 2 de emerxencia.

Esta é a estimación recollida na última actualización das cifras dos incendios enviada pola Consellería do Medio Rural, que unicamente informa de lumes superiores a 20 hectáras. Ademais do de Avión, en Ourense continúan activos outros dous lumes. O de Chandrexa de Queixa e Vilariño de Conso, unidos nun só con tres focos e cunha "evolución favorable", calcinan ao redor de 19.000 hectáreas, parte delas tamén nos municipios de Manzaneda, Montederramo, A Pobra de Trives, O Bolo e Laza.

Dos tres focos, unicamente un deles, na parroquia de Mormentelos (Vilariño), está activo. Os outros dous, en Requeixo e Parafita (Chandrexa), están estabilizados. Así mesmo, o de Carballeda de Valdeorras, na parroquia de Casaio, calcina 4.400 hectáreas en Galicia tras propagarse a Ourense o lume iniciado o xoves 14 de agosto na localidade zamorana de Porto.

ESTABILIZADOS

Por outra banda, en Ourense, están estabilizados cinco incendios, dos cales tres se atopan neste estado desde o fin de semana. Estes son os lumes de: Larouco, parroquia de Seadur (30.000 hectáreas calcinadas en territorio galego); Oímbra e Xinzo de Limia, nas parroquias da Granxa e Gudín (17.000 hectáreas); A Mezquita, parroquia da Esculqueira (10.000 hectáreas); Carballeda de Avia e Beade (4.000 hectáreas), e Vilardevós, parroquia de Vilar de Cervos (900 hectáreas).

Outros cinco incendios permanecen controlados: Maceda, nas parroquias de Santiso e Castro de Escuadro (3.500 hectáreas); Vilardevós, parroquia de Moialde (600 hectáreas; Montederramo, parroquia de Paredes (120 hectáreas); Riós, parroquia de Trasestrada (40 hectáreas), e Carballedo, parroquia da Cova (100 hectáreas).

En Lugo, está controlado desde a mañá do domingo o incendio de Carballedo, na parroquia de Cova, que se orixinou o xoves e obrigou a decretar a Situación 2 pola súa proximidade ao núcleo de Oleiros.

En Pontevedra, está estabilizado desde a tarde do sábado o lume de Vilaboa, na parroquia de Santa Cristina de Cobres, que tamén se declarou o xoves e levou igualmente a activar o nivel 2 de emerxencia pola súa proximidade a casas.

UME

A Unidade Militar de Emerxencias (UME), adscrita ao Ministerio de Defensa, despregará un total de 22 patrullas na provincia de Ourense en misións de vixilancia e presenza ante a vaga de incendios que arrasa miles de hectáreas en diversos municipios.