A Xunta activa desde o luns as axudas para os damnificados polos incendios

As axudas da Xunta para as persoas damnificadas polos incendios forestais publícanse este sábado no Diario Oficial de Galicia (DOG) e poderán solicitarse a partir do luns, cando xa estarán en funcionamento 16 oficinas de atención específicas. O presidente autonómico, Alfonso Rueda, explicou que serán compatibles coas que poidan convocar outras administracións e que o obxectivo é que “ninguén con necesidade quede sen recibilas”. No caso das vivendas, establécese unha contía máxima de 132.000 euros para a reconstrución ou adquisición dunha nova en caso de tratarse de residencia habitual, con axudas complementarias para mobiliario e alugueiro durante a obra. Para as segundas residencias, a cifra redúcese a 60.000 euros, máis 5.400 para reposición de bens.

Tamén se inclúen compensacións ás empresas e industrias afectadas polos lumes, con cantidades que poden alcanzar ata 1,5 millóns de euros en casos de gran impacto socioeconómico. No sector agrícola, prevese un máximo de 200.000 euros para maquinaria e ata 750.000 por perdas de produción; na gandaría, 15.000 euros para alimentación complementaria e axudas pola morte de animais ou perda de colmeas. As explotacións forestais poderán recibir ata 50.000 euros para maquinaria ou retirada de madeira queimada, e 100.000 para repor repoboacións destruídas. Ademais, o sector turístico contará con liñas específicas que se concretarán nas próximas semanas.

As indemnizacións por danos físicos ás persoas van desde os 87.500 euros en caso de falecemento ou incapacidade permanente ata 120 euros diarios por hospitalización. Ademais, os concellos recibirán apoio económico polos gastos de extinción e danos sufridos, e os propietarios de terreos poderán solicitar ata 30.000 euros para sementeira de cereais, 12.000 para infraestruturas de apoio á fauna silvestre e 550.000 para recuperar infraestruturas de uso público danadas. Paralelamente, a Xunta prevé aprobar este luns medidas urxentes para actuar sobre os terreos queimados e evitar efectos da erosión polas choivas.

As axudas teñen carácter complementario e serán compatibles con outras indemnizacións públicas ou privadas, sempre que a suma non supere o 100 % dos danos. Os beneficiarios deberán manter a actividade durante un mínimo dun ano —ou tres anos no caso de recibir máis de 600.000 euros—, e terán facilidades fiscais mediante prórrogas nos prazos de declaracións tributarias. Rueda lembrou tamén o compromiso do presidente Pedro Sánchez de convocar axudas estatais e reclamou que cheguen con rapidez: “o que pido é que o fagan rápido, pode ser fácil, acabamos de mostralo”.