O Goberno afea á Xunta crear un centro de menores migrantes: "Galicia está moi por baixo dos niveis de España"

O secretario de Mocidade, Rubén Pérez, criticou á Xunta pola creación dun centro único de menores migrantes en Monforte de Lemos para acoller aos rapaces trasladados desde Canarias, Ceuta e Melilla. Na súa opinión, Galicia “está moi por baixo dos niveis migratorios do resto de España” e a decisión do Goberno galego non é a máis axeitada.

En declaracións á Cadea SER, Pérez explicou que este tipo de dispositivos son “habituais” nos sistemas de protección autonómicos, pero advertiu de que o seu uso debe definirse con claridade. Se serve como centro de primeira acollida para posteriores derivacións, considera que “non sería tan grave”, mais alertou contra o risco de instaurar “un sistema paralelo” para menores estranxeiros que poida acabar xerando guetos.

O representante do Goberno estatal instou á Xunta a ir máis aló da simple creación de “espazos físicos” e a garantir itinerarios de integración á vida adulta e acompañamento efectivo. Tamén lembrou que Galicia é unha terra con tradición migrante e subliñou que, a diferenza doutros territorios, “non hai extrema dereita porque non existe un discurso de odio antiimigración”.

Por outra banda, preguntado sobre a guerra en Gaza, Pérez cualificou a actuación de Israel como “maquinaria de exterminio” e asegurou que o incumprimento das resolucións da ONU vén de décadas atrás. Aplaudiu a reacción social en España e defendeu que o Goberno progresista está “na posición que lle corresponde”, aínda que admitiu que a ruptura de relacións diplomáticas sería máis simbólica que o paquete de medidas anunciado polo presidente Pedro Sánchez.