O PPdeG aspira a "consolidar" as súas maiorías nas municipais no 2027 para evitar os "pactos entre perdedores"
A meta dos populares galegos é que os próximos gobernos municipais "respondan só á decisión expresada polos galegos nas urnas".
Por Europa Press / Redacción | SANTIAGO DE COMPOSTELA | 12/10/2025 | Actualizada ás 13:28
O PPdeG aspira a "consolidar" as súas maiorías en forma de "gobernos fortes e estables" nas eleccións municipais de 2027 xa que "é a única forma" de que os "pactos de perdedores do PSdeG e do BNG non sigan traendo espectáculos e inestabilidade" aos concellos galegos. Así o sinalou a secretaria xeral do PPdeG, Paula Prado, tras reunirse na sede autonómica co Comité de Cidades do seu partido, un órgano que está coordinado polo alcalde de Ferrol, José Manuel Rey Varela.
Os populares, puxeron a Ferrol como "exemplo do que hai que facer" e o "modelo" que queren estender ao resto das cidades de Galicia. A contraposición, asegurou Paula Prado, está nos "pactos de perdedores" dun PSdeG e dun BNG que, no caso dos socialistas, "xa non saben que dicir para tapar" ao presidente do Goberno, Pedro Sánchez, e "a súa corrupción" e o BNG "dáse conta agora" de que coas súas "minorías absolutas non van a ningunha parte".
"Cunha representación de 6 de 25 ou de 5 de 21 concelleiros cren que teñen unha autoridade moral de falar en nome dunha minoría que as urnas non lle deron", afirmou Paula Prado. Pola súa banda, Rey Varela afirmou que a meta dos populares galegos é que os próximos gobernos municipais "respondan só á decisión expresada polos galegos nas urnas".
