En Marea insiste en contar con grupo parlamentario propio no Congreso
Di que se trata "dun suxeito político autónomo” e que “debe contar con expresión propia".
Por Galicia Confidencial | Madrid | 15/07/2016 | Actualizada ás 11:57
En Marea reivindicará, de novo, o dereito a constituír un grupo parlamentario propio no Congreso, a pesar da negativa da pasada e curta lexislatura. A formación galega, na que están Podemos, Anova, EU, as mareas municipalistas e outros colectivos, exporá que superaron os requisitos do Regulamento de contar con 5 deputados na Cámara Baixa e lograr máis do 15% dos votos en todas as circusncriccións.
Sen embargo, e tal e como xa aconteceu hai uns meses, o resto de grandes partidos entende que En Marea non se conformou como coalición propia xa que ía da mana de Unidos Podemos. Sen embargo, os deputados da coalición galega, en previsión de que a vindeira semana se conforme a nova Mesa do Congreso trala constitución das Cortes, intensificarán as conversas e negociacións coas diferentes forzas con representación no Parlamento.
O seu obxectivo é trasladaralles o requerimento de grupo, “ao tratarse dun suxeito político autónomo” e que “debe contar con expresión propia tal e como recoñeceu de novo o electorado nas eleccións do pasado 26 de xuño”.
No caso de darse un novo bloqueo de PP, PSOE e Ciudadanos na Mesa do Congreso á creación de grupo propio, En Marea anuncia que “avaliará os diferentes escenarios e alianzas optando por aquel que lle dea unha maior autonomía e espazo e que lle permita aos seus parlamentarios unha maior efectividade á hora de defender os intereses de Galicia nas Cortes do Estado”. Na pasada lexislatura incluise, de facto, no grupo de Podemos.
