SANTIAGO DE COMPOSTELA | 05/10/2017 | Actualizada ás 14:24 por EUROPA PRESS
O vicepresidente da Xunta, Alfonso Rueda, atribuíu a "algún" dos portavoces da oposición unha "visión apocalíptica" de Galicia durante a súa intervención no Debate sobre o Estado da Autonomía, e considerou que este panorama "cada vez creo menos xente".
Fronte a isto, esperou "recibir achegas positivas" por parte dos grupos, co obxectivo de que este venres se aproben resolucións no Parlamento galego "canto máis consensuadas" e sobre cuestións "que se poidan facer".
A este respecto, na rolda de prensa posterior ao Consello, Rueda contrapuxo a "estabilidade" de Galicia, que na súa opinión "permite" executar medidas, coa "enorme inestabilidade que algúns queren trasladar" á comunidade.
Sobre a primeira sesión do debate, valorou que o presidente da Xunta, Alberto Núñez Feijóo, expuxo unha "visión realista" das circunstancias, sobre actuacións xa acometidas e "tamén o que se quere facer" a partir de agora, nunha Galicia "con mellores perspectivas", o que "permite facer máis cousas".
Neste sentido, reivindicou algúns dos anuncios de Feijóo no Parlamento, referidos a rebaixas fiscais, atención á dependencia e "máis axudas sociais". "Vai por esa liña", dixo.
Ademais, considerou que "as cousas que se propoñen" por parte do Executivo autonómico "vanse facendo" e advertiu de que "o tempo demostrará" este extremo, tamén cos novos anuncios.
Da oposición, pola contra, afeou que teña "pouco que achegar", e fixo alusión aos últimos resultados electorais na comunidade para tratar de evidenciar que "cada vez" cre "menos xente" as ideas que transmiten estes grupos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.