10.000 sinaturas para frear o eucalipto en Galicia

Protexer e mellorar os hábitats de bosque autóctono, a racionalización da xestión do monte e a loita contra os incendios forestais, e en particular, frear a invasión do eucalipto en Galicia. Este é o principal obxectivo da proposición de lei por iniciativa lexislativa popular (ILP), que este xoves presentaron en Pontevedra os seus impulsores.

Os colectivos que puxeron en marcha esta ILP, reunidos en Pontevedra, explicaron a necesidade de recoller un mínimo de 10.000 sinaturas para poder presentar no Parlamento galego unha lei para "salvar o bosque galego do lume e dos eucaliptos". Tras esta iniciativa están uns 60 sindicatos, organización e colectivos como a CIG, Fruga, a Organización galega de montes en man común, Adega, Irmandade Illa de Tambo, a Asociación Monte Pituco, Umia viva, as federacións de asociacións veciñais Castelao e Teucro, APDR ou Vaipolorío. Todas elas agrupáronse na entidade 'Cousa de Raíces', que "pretende virar 180º as políticas de xestión dos nosos montes e do noso medio rural".

A campaña de recollida de sinaturas estenderase por toda Galicia até o próximo 24 de marzo. O obxectivo é non só acadar ese mínimo de 10.000 sinaturas, senón superalo amplamente. Para isto, os impulsores instalarán mesas informativas en puntos claves nas rúas para poder asinar, organizarán charlas para dar a coñecer a situación actual dos montes e promoverán mocións nos plenos dos concellos e nas deputacións.

Os promotores desta ILP responsabilizan á Xunta de Galicia do abandono do rural e das terras agrarias para promover a súa posterior eucaliptización. De feito, alertan de que un de cada cinco metros cadrados de chan forestal está xa ocupado por eucaliptos para, principalmente, abastecer a industria da madeira e do papel, e moi en particular, a ENCE. Datos dun último estudo científico cifran en 434.000 as hectáreas ocupadas polo eucalipto en Galicia duns 2 millóns de hectáreas forestais que ten o país. Ese traballo, realizado por investigadores das universidades de Vigo e Coimbra, evidencia por vez primeira que os incendios forestais que se producen en Galicia contribúen a aumentar a capacidade de invasión do Eucalyptus globulus, a especie de eucalipto máis estendida no país, que ameaza a subsistencia da vexetación autóctona.

Unha das principais finalidades da ILP é conseguir que, ao igual que xa fixo Portugal, se decrete unha moratoria para as novas plantacións de eucalipto e que se elimine dos espazos protexidos, Rede Natura e das terras de alto valor ecolóxico, coa intención de recuperar os bosques autóctonos.

A idea é compatibilizar os aspectos produtivos do monte coa conservación dos hábitats naturais, particularmente dos bosques nativos.