Beiras compara a crise de En Marea coa escisión no BNG e dá un toque de atención a Podemos e Izquierda Unida
O fundador de Anova advirte á dirección de En Marea que non pode "negar que hai un problema" e carga contra o pacto entre Podemos e Izquierda Unida. Anova súmase á proposta de Compostela Aberta para renovar a dirección do partido instrumental. "O inmobilismo cando hai problemas ao único que conduce é a que podrezan as cousas", di Antón Sánchez.
Por E.P. | SANTIAGO DE COMPOSTELA | 14/07/2018 | Actualizada ás 17:30
Anova confirmou que se suma á proposta lanzada desde Compostela Aberta para iniciar un proceso de reconfiguración de En Marea; unha proposición que valoran como "positiva" e "construtiva" de cara a abrir "un diálogo" que cren "imprescindible para a construción da unidade popular fronte aos problemas que existen" na actualidade no espazo político.
Así o acordou a coordinadora da formación nacionalista na súa reunión deste sábado, día no que Anova celebra o sexto aniversario da súa fundación en 2012 da man de Xosé Manuel Beiras, quen, xunto ao portavoz nacional do partido, Antón Sánchez; instou á dirección de En Marea a que recoñeza que "existe un problema" e que para a súa solución é necesaria a apertura dun diálogo entre os diferentes actores que conforman o espazo político da chamada unidade popular.
"Negarse a falar a min lémbrame a certos tempos en determinadas forzas políticas que terminaron como acabaron", apuntou Beiras nunha alusión velada ao BNG, partido do que foi líder e que abandonou após a ruptura da fronte nacionalista polas desavinzas internas, o que derivou no nacemento de Anova hai agora seis anos.
Nesta liña, o histórico dirixente nacionalista exhortou á coordinadora de En Marea (que equivale á executiva dun partido clásico) a "que entenda" que a proposta de Compostela Aberta "non vai contra ninguén", nin trata de xerar unha "loita polo poder", senón que persegue "resolver os problemas" que a dirección que encabeza Luís Villares quere "negar".
"Se hai un problema, hai que abordalo", engadiu, para logo lembrar que o documento da proposta realizada pola marea santiaguesa foi aprobado nunha asemblea a instancias da súa coordinadora, polo que, para Beiras, non pode ser entendido como un movemento impulsado por "un notable ou unha baronía". "Non se pode mentir nin falsear a realidade", sinalou en referencia ás voces que aseguran que o movemento procede "de Anova ou do alcalde de Santiago".
PROPOSTA DE COMPOSTELA ABERTA
Para a coordinadora de En Marea entende que a proposición da formación que encabeza o alcalde de Santiago, Martiño Noriega (tamén membro de Anova); de crear unha "mesa da confluencia" con presenza de partidos e mareas reproduce os esquemas dos partidos clásicos e traizoa o espírito fundacional de En Marea, configurado como unha formación de adscrición individual.
Unha mesa da confluencia na que participará Anova "cando sexa convocada", como confirmou o seu portavoz nacional, Antón Sánchez, que opina que "o inmobilismo" fronte aos "problemas" conduce "a que podrezan as cousas".
Compostela Aberta propón tamén o adianto a setembro das eleccións ao Consello das Mareas, órgano de dirección do partido instrumental e que certas voces do rupturismo cren controlado por sectores que non representan a "pluralidade" do espazo.
O movemento de Compostela Aberta produciuse nun momento no que a división interna que existe no seo rupturista desde a configuración dos seus órganos de dirección se viu avivada após o apoio de certos membros da coordinadora ao nacemento de Marea de Ferrol, proxecto herdeiro de Marea Ártabra promovido por persoas que proceden de Ferrol en Común, que lidera o alcalde ferrolán, Jorge Suárez.
Para Beiras, membro do Consello das Mareas e que hai dúas semanas saíu en defensa da marea que goberna Ferrol desde 2015, o ocorrido na cidade departamental é "un síntoma" de que a dirección de En Marea "non ten claro" que debe respectar a autonomía dos proxectos municipais.
"Se interfere e prefire operar desde arriba como pode operar un partido convencional como o PSOE, estariamos perdidos. Hai algunhas interferencias, algunhas moi graves como ocorreu en Ferrol", remarcou o veterano político, que cre que ante "o reto" que supón a cita coas urnas do próximo ano "non pode haber interferencias" porque o obxectivo é "reduplicar" a "vangarda que representa o municipalismo e a unidade popular".
"PÓR EN XOGO AOS ACTORES"
"Hai que pór en xogo a todos os actores. Porque unha cousa é que haxa un partido de afiliación individual a nivel galego e outra cousa é que os actores que están en presenza son moi diversos. E mesmo algúns, que son de nivel estatal, tentando interferir tamén, como é o caso de Podemos e o da portavoz de Podemos Galicia (Carmen Santos) dicindo constantemente que non é de En Marea", espetou Beiras.
A continuación, comentou que o espazo político da unidade popular vive "unha conxuntura política moi perigosa" porque, segundo Beiras, as "alianzas a nivel Estado" de Izquierda Unida e Podemos pretenden "supeditar" ás súas decisións a configuración das candidaturas das mareas galegas para as eleccións do próximo.
Ademais, tamén cre, como xa expuxo no plenario de En Marea celebrado en marzo e no que foi o único referente do espazo político que acudiu á cita para apoiar a Villares, que os deputados de En Marea no Congreso están sometidos ás decisións do Grupo Confederal de Unidos Podemos.
RECUPERAR O ESPÍRITO DAS MAREAS LOCAIS
Así as cousas, Xosé Manuel Beiras considera que para liquidar as dificultades, En Marea debe apostar polo modelo de unidade popular establecido en 2015 co nacemento das mareas municipalistas. "O proceso da unidade popular non empeza coa creación do partido (En Marea), senón co surgimiento de alternativas e proxectos de unidade popular locais en 2015", apuntou.
"O fundamental é traballar para que En Marea recupere o proxecto e funcionamento inicial. As mareas municipais son o motor, as pioneiras e as que crearon unha situación política distinta", concluíu.
