A serie 'Fariña', sobre o narcotráfico en Galicia, chega a Netflix
Faino logo de cultivar grandes resultados de audiencia durante a súa emisión en Antena 3.
Por E.P. | SANTIAGO DE COMPOSTELA | 04/08/2018 | Actualizada ás 18:23
A plataforma audiovisual Netflix incorporou este sábado ao seu catálogo de contidos a serie 'Fariña', producida por Atresmedia en colaboración con Bambú Producións e que narra a historia do narcotráfico en Galicia nos anos 80 e 90.
Logo de cultivar grandes resultados de audiencia durante a súa emisión en Antena 3, a serie inspirada no libro homónimo do coruñés Nacho Carretero chega a Netflix unha vez arquivada a demanda presentada polo exalcalde do Grove, Alfredo Bea Gondar, e que motivou o secuestro da publicación durante varios meses.
'Fariña' conta a historia do narcotráfico nas Rías Baixas desde os anos 80, cando os contrabandistas de tabaco comezan a organizar descargas de droga na costa galega. Rodada en Galicia e estreada en televisión a finais do pasado mes de febreiro, a trama pivota ao redor da traxectoria de personaxes como Sito Miñanco (Javier Rei), Manuel Charlín (Antonio Durán 'Morris'), Laureano Oubiña (Carlos Blanco) ou Vicente Otero 'Terito' (Manuel Lourenzo).
