O concello da Coruña celebrará un pleno sobre o peche de Alcoa e os traballadores piden apoio político

A Corporación municipal da Coruña celebrará este venres un pleno extraordinario no que se aprobará unha declaración institucional --consensuada por todos os grupos políticos (Marea Atlántica, PSOE, PP e BNG)-- en contra do peche da planta de Alcoa e reclamando a retirada do despedimento colectivo anunciado pola empresa. O pleno foi convocado para as 11,30 horas, media hora despois da reunión que o alcalde, Xulio Ferreiro, manterá co comité de empresa. Farao despois de desprazarse o mércores á fábrica, xunto con outros concelleiros.

No encontro, segundo informan fontes municipais, reiteroulles "a necesidade de que tanto administracións públicas como formacións políticas traballen en común para evitar o peche da fábrica". En canto á sesión plenaria, desde o goberno local confirmouse que o único punto do día será o texto acordado este xoves na Xunta de Portavoces. Na iniciativa, ínstase a Xunta e Goberno central a conformar, xunto co Concello da Coruña, "unha fronte institucional común en defensa do emprego, do mantemento da actividade industrial de Alcoa e, en consecuencia, da retirada do ERE presentado pola empresa".

APOIO ÁS MOBILIZACIÓNS

Tamén se manifesta o apoio da Corporación municipal ás mobilizacións que convoquen os traballadores, como a prevista este sábado, a partir das 11,00 horas, e que sairá da praza da Palloza. Os acordos contidos na declaración institucional serán trasladados, posteriormente, a todos os grupos con representación tanto no Parlamento galego como na Deputación da Coruña, e ao Congreso. Por outra banda, segundo informa o Consistorio, ademais de co comité de empresa, este mércores o alcalde iniciou unha rolda de contactos con conversacións tanto co director da fábrica como coa alcaldesa de Avilés, Mariví Monteserín; o delegado do Goberno  en Galicia, Javier Losada; o conselleiro de Industria, Francisco Conde e a ministra de Industria, Reyes Maroto.

Mentres, este xoves, outros representantes municipais como os concelleiros socialistas Fito Ferreiro e José Manuel Dapena desprazáronse á fábrica de Alcoa na Grela para expresar o seu apoio aos traballadores concentrados. Despois da Xunta de Portavoces, o portavoz do grupo municipal socialista, José Manuel García, manifestou que o pleno busca expresar "a solidariedade" co cadro e tamén "unir os esforzos para reverter a situación".

 DEFENDENSA DA RENDIBILIDADE 

Os traballadores da fábrica de Alcoa na Coruña defenderon este xoves a rendibilidade desta planta, á vez que reprocharon á empresa non facer ningún tipo de investimento no últimos catro anos, logo a ameaza de peche que houbo en 2014. Así o trasladaron os empregados que, na entrada da planta, manteñen unha concentración permanente desde o mércores, unha vez que se comunicou a decisión da empresa. Nas portas, pódense ler carteis en contra do peche e en demanda dunha tarifa eléctrica competitiva.

En declaracións aos xornalistas, Juan Ramón Paseiro, delegado sindical de UXT, explicou que desde este mércores tampouco permiten que salga mercadoría. "Non imos permitir que Alcoa siga facendo os seus negocios á conta do noso traballo", expuxo. Con 46 anos, dos que os últimos 17 lévaos traballando nesta fábrica, defendeu a rendibilidade da planta, responsabilizando á empresa da ausencia de investimentos para a súa modernización. "Este conto de que somos obsoletos xa nolo aplicaron no 2014, pero non fixeron ningún investimento", recalcou en liña co manifestado tamén por outros empregados.

MOBILIZACIÓNS

Con todo, insistiu en que a planta é "rendible", do mesmo xeito que Alcoa "como grupo". Por iso, instou aos representantes políticos a adoptar medidas para evitar o peche. "O tempo aprema", advertiu este traballador, quen confirmou que o cadro levará a cabo un calendario de mobilizacións, para solicitar tamén o apoio da cidadanía.

A primeira manifestación será este sábado e partirá ás 11,00 horas desde a praza da Palloza para concluír ante a Delegación do Goberno en Galicia. Esta tarde, o comité de empresa celebrará, ademais, unha nova reunión para analizar as protestas que levarán a cabo proximamente. Sobre a ameaza de peche da planta fai catro anos, Paseiro lembrou que a diferenza está en que agora "se nos pon encima da mesa os prazos dun expediente de extinción de emprego". "Nin sequera dannos opción a falar de posibles solucións á tarifa eléctrica".

CARGA DE TRABALLO

Por iso, admitiu que a preocupación entre os empregados é "maior" que fai catro anos. O mesmo manifestaron outros empregados. Así, Gema Rivas, con 42 anos e 15 anos traballando na fundición, defendeu que nestes momentos, e en relación a fai catro anos, "hai un volume importante de traballo". Por iso, reclamou o apoio político para evitar a perda de case 400 empregos nunha fábrica na que a maioría dos traballadores teñen menos de 45 anos.

Así o expuxo Miguel Conde, representante sindical de CC.OO., que afirmou que entre o cadro hai "enfado" pola maneira de actuar de Alcoa, pero tamén "forza e ganas" para frear o peche. "Isto é o único que nos queda e nós non somos os culpables dos custos da enerxía". Este traballador instou tamén a abrir unha mesa de negociación para reverter a decisión da empresa na que estean presentes o Goberno, a Xunta e o Principado de Asturias, ante o anuncio tamén de peche da planta de Avilés. "Queremos decisións, estamos cansados de promesas políticas", indicou reclamado ao Goberno que "tome unha decisión no tema de materia enerxética para a industria e os consumidores". Por outra banda, admitiu que, antes do anuncio de peche, sospeitaban de que a compañía estadounidense tomaría algunha medida, pero "non tan traumática".