Por E.P. | SANTIAGO DE COMPOSTELA | 10/01/2019 | Actualizada ás 19:23
A sudelegada do Goberno en Lugo, Isabel Rodríguez, asegurou que a chegada do PSOE á Moncloa supuxo acabar con "sete anos de abandono" para a provincia por parte do PP, partido ao que, segundo Rodríguez, Lugo "non ten nada que agradecer".
"Nesta provincia todos sabemos o estado de abandono no que nos sumiu o PP, tanto nas infraestruturas como na atención ás persoas", manifestou a subdelegada do goberno en Lugo este xoves.
Isabel Rodríguez destacou que, tal e como deixou claro o delegado do Goberno en Galicia, Javier Losada, no seu relatorio sobre "o moito que leva feito nuns meses este Goberno", o PSOE non garda "en ningún caixón ningún proxecto" que mellore a vida dos lucenses a diferenza do que, na súa opinión, o PP fixo "coa estación intermodal" de Lugo.
Así mesmo, sinalou que a prioridade do Goberno é "atender ás necesidades das persoas". "Por iso nós traballamos na defensa dos intereses e da seguridade dos veciños, que llo pregunten, por exemplo, aos concellos de Lugo ou Ribadeo", indicou.
Fronte a iso, defendeu que Lugo segue sufrindo as consecuencias da xestión do PP nas institucións que goberna e preguntouse quen anulou "ás agachadas" os acordos para a devolución dos edificios da Vella Residencia que aínda continúan adscritos á Xunta para fins sanitarios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.