"Máis Galiza cuestiona a organización do BNG"

Novo capítulo na carreira de manifestos, artigo e comunicados críticos entre as correntes e partidos que forman o BNG. Quen se pronuncia agora é unha das militantes máis relevantes do Movemento Galego ao Socialismo, partido comunista que foi o cuarto máis representado na última Asemblea que forma parte da actual Executiva a través de Rafa Villar.

Acusacións de cuestionar sistematicamente a Guillerme Vázquez

O máis sorprendente do artigo de Paula Castro (número dous da lista que logrou o 9% dos votos na pasada Asemblea Nacional) na web do MGS é a súa defensa dun programa claramente de esquerdas e nacionalista. O que chama máis a atención é a súa fortísima crítica a Máis Galiza, a corrente de ex-quintanistas que encabeza o voceiro parlamentario Carlos Aymerich e que defende un BNG de esquerdas pero máis centrado, lonxe da retórica marxista que defenden o MGS e a UPG, a forza maioritaria na fronte.

"Para acadar o seu obxectivo de facerse co BNG, +G ten deseñado unha estratexia (entendo que os pasos que está a dar non son improvisados) de sistemático desgaste da liña política que vén defendendo o BNG desde a última asemblea nacional, de desgaste da figura do portavoz nacional e de cuestionamento da propia organización. Unha dinámica que estancou o traballo político e que dificultou a recuperación dunha credibilidade cuestionada por mor dos erros cometidos no paso polo goberno", escribe Castro.

Entre as propostas presentadas ao fío do Día da Patria, Castro interpreta que tres (a da UPG, a dos irmadiños e a do propio MGS) "manteñen como obxectivo estratéxico a emancipación nacional e social de Galiza". Pola contra, Máis Galiza fai unha "emenda á totalidade" "aposta polo autonomismo, por asumir e xestionar o sistema, pola vía unicamente institucional e por unha organización xerarquizada e menos participativa". Na súa opinión a aposta do grupo que lidera Carlos Aymerich está trabucada, pois o BNG logrou os maiores avances electorais canto máis escorou o seu discurso á esquerda e ao nacionalismo. A xornalista lembra as gabanzas dos directores de El Correo e Xornal ao xiro á dereita realizado mentres Anxo Quintana era voceiro nacional e os retrocesos electorais desa época.

Por último, Castro argumenta que +G aposta por "lobbys" como Iniciativa Ben Común e rexeita a súa proposta dunha candidatura conxunta ao Senado de toda a esquerda galega. Aos alcaldes do Encontro Irmandiño e Máis Galiza que asinaron un manifesto crítico coa dirección do BNG lémbralles que só sumaron o 11% dos votos da fronte e que a súa opinión está sometida ás asembleas locais, unha idea na que tamén insistiron dirixentes da UPG.