O pesqueiro galego contra o que bateu un buque asiático levará a terra os tripulantes rescatados

Estudan interromper a campaña para trasladar a Montevideo os 30 mariñeiros chineses afectados, tras unha colisión preto da costa arxentina. O arrastreiro tan só sufriu "un problema no casco" e a súa tripulación, maiormente de Galicia, está "en perfectas condicións"

Por E.P. | SANTIAGO DE COMPOSTELA | 16/02/2019 | Actualizada ás 11:49

Comparte esta noticia

O arrastreiro galego 'Pesca Vaqueiro' contra o que chocou un buque chinés preto de Arxentina prevé interromper a súa campaña para levar a tripulación asiática rescatada ata Montevídeo (Uruguai), aínda que polo momento estase "programando a loxística" para decidir os pasos a seguir.

Así o explica en declaracións a Europa Press o presidente da cooperativa de armadores de Vigo (ARVI), Javier Touza, quen explica que parte da tripulación rescatada se atopa no 'Pesca Vaqueiro' e outro grupo no 'Iván Nores', que acudiu á zona a axudar nas tarefas de rescate.

O pesqueiro 'Zhongyuanyu 11' afundiuse tras chocar co 'Pesca Vaqueiro' fronte ás costas arxentinas na madrugada do venres. Tras o suceso, varios barcos que se atopaban na zona axudaron ao rescate duns 30 tripulantes chineses.

O accidente produciuse nunha zona na que "hai gran concentración de embarcacións", con ata 400 buques. Moitos deles son asiáticos, entre os que hai "gran nerviosismo" ao dedicarse á captura de pota mentres que este cefalópodo parecido á lura "non apareceu e hai pouca pesca".

O arrastreiro 'Pesca Vaqueiro' tan só sufriu "un problema no casco" por danos na chapa e a súa tripulación -entre 35 e 40 persoas, maioritariamente galegos- atópase en "perfectas condicións".

Touza explica que a obriga "legal" ao seguir as pautas de navegación a nivel internacional, "pero sobre todo a moral", é a de levar a porto seguro os mariñeiros rescatados, polo que se prevé ir a Montevídeo co fin de que poidan ter unha revisión médica. Isto supón "tres ou catro días de navegación", pero "a loxística é incerta", xa que se descoñece se a armadora chinesa ten outros barcos na zona e se se quererá facer cargo deles.

Barcos no porto. Europa Press - Archivo
Barcos no porto. Europa Press - Archivo

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta