VOTA | Investidura de Pedro Sánchez ou novas eleccións xerais?
GC pregunta aos lectores se cren necesario acabar coa parálise parlamentaria en España facilitando o goberno socialista ou se é necesario ir aos cuartos comicios desde 2015.
Por Galicia Confidencial | Santiago de Compostela | 02/07/2019 | Actualizada ás 11:38
España volve estar nunha encrucillada. A fragmentación política e a inestabilidade parlamentaria teñen practicamente bloqueado o goberno do Estado desde o fin do bipartidismo, nun escenario no que as posicións son cada vez más radicais, cunha dereita cada vez máis extrema, unha esquerda estatal incapaz de deseñar unha vía de coalición e un maior peso de partidos independentistas, nacionalistas e rexionalistas (agás no caso de Galicia, fóra do taboleiro parlamentario).
As dificultades para chegar a consensos e formar maiorías suficientes para conformar un goberno estable volven abrir a posibilidade dunhas novas eleccións xerais este ano. Serían as cuartas desde 2015 e as segundas este ano.
PSOE e Podemos non se poñen de acordo no modelo de goberno. Os primeiros están abertos a reeditar a fórmula pasada, con pactos puntuais cos morados, pero conformando un goberno unicolor socialista. Os segundos esixen esta vez ocupar carteiras ministeriais, malia o seu retroceso electoral. E aínda que pactasen calquera fórmula, sería insuficiente, pois necesitarían máis apoios para investir a Pedro Sánchez presidente e aprobar leis e reformas durante a lexislatura. Aí entran en xogo outras forzas que serían claves para isto: independentistas, nacionalistas e rexionalistas. Todos queren coller cacho a cambio do seu voto a Sánchez.
A suma máis simple que facilitaría un novo goberno é a de PSOE e Ciudadanos, pero as enormes tensións entre ambas as partes e a radicalización dos laranxas (cada vez máis achegados á extrema dereita, á que os de Rivera e o PP abriron as portas de gobernos autonómicos, provinciais e locais) fan, a día de hoxe, imposible esa vía.
Segundo as enquisas, nunhas novas eleccións todos perderían, agás o PSOE, que incrementaría a súa forza parlamentaria. Podemos, Vox e Ciudadanos serían castigados e o PP, aínda que podería avanzar algo, seguiría sendo unha forza sen capacidade no Parlamento e no Senado, cada vez máis alonxada do PSOE en número de escanos. Iso si, as sumas practicamente serían as mesmas entre os distintos bloques, o que nos levaría, segundo as sondaxes, ao mesmo escenario.
O debate agora é se debe haber investidura de Pedro Sánchez co apoio de Podemos e doutras forzas de esquerda e nacionalistas e independentistas, ou polo menos coa abstención de Ciudadanos, ou se o mellor sería volver convocar eleccións.
Ante esta parálise parlamentaria, GC pregunta aos seus lectores se o mellor para o interese xeral sería desbloquear a situación e facer andar o Estado facilitando a investidura de Pedro Sánchez (ben sexa cun goberno de coalición ou de pactos puntuais) ou se manter a parálise parlamentaria e convocar novas eleccións para despexar o camiño.
