Por Galicia Confidencial | SANTIAGO DE COMPOSTELA | 03/09/2020 | Actualizada ás 22:00
Nova mostra de contaminación derivada da vella mina de Touro. A plataforma veciñal Mina Touro - O Pino NON vén de facer a "enésima" denuncia contra os verquidos da explotación a ceo aberto que, segundo denuncian, van parar ás augas dos ríos da contorna. Neste caso, a alarma da organización céntrase no rego Portapego, un máis dos moitos "ríos mortos" de Touro.
A plataforma decidiu denunciar o "estado lamentable" do río cun vídeo no que se pode apreciar unha coloración atípica e a "presenza de abundantes sólidos" no seu leito. Esta situación viría determinada porque o Portapego, ao igual que varios dos ríos do entorno, ten o seu nacemento na antiga mina de cobre que, malia ser pechada definitivamente en 1988, segue a desprender materiais nocivos sobre o entorno, de acordo coa denuncia da plataforma.
❌Pois velaquí está hoxe o Portapego ao seu paso por Touro co 80% de suposta restauración, según vende @VATOP_gal na publirreportaxe de @elcorreogallego.
— Mina Touro - O Pino NON (@minatouropinono) September 1, 2020
A quen pretenden enganar⁉️
E a ver se @GaliciaSostible e @galiciacrece
toma medidas dunha vez!#MinaTouroOPinoNON#mentirasnon pic.twitter.com/hla3EHCrl5
Dende a plataforma afean á empresa responsable da mina a escaseza de medidas para poñer fin ós verquidos mentres publican "publirreportaxes" nos medios. "Son moitos os informes oficiais que corroboran as denuncias continuadas do estado das augas dos ríos Portapego, Pucheiras, Angumil, Felisa, Lañas...", explican dende a plataforma, que insta ás distintas institucións a mover ficha para poñer fin á situación. "Agora é o momento e a oportunidade de demostrar que queren exercer a súa responsabilidade como institucións, cumprir e facer cumprir a lexislación", zanxan.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.