Asalto ao capitolio: de cando 100 alcaldes do PP tentaron entrar pola forza ao Parlamento Galego

A noticia da toma do capitolio segue marcando a axenda a miles de quilómetro de Washington D.C. Nunha mañá marcada polas declaracións dos líderes políticos de Galicia --entre as cales falta, ata o momento, a de Núñez Feijóo--, cómpre botar a vista atrás a esas ocasións nas que o 'capitolio' particular de Galicia, situado na rúa do Hórreo, sufriu altercados que obrigaron a suspender as sesións ou mesmo se viu ante o risco dunha entrada pola forza.

Aínda que as mobilizacións ás portas do Parlamento non son atípicas en Galicia --este mesmo verán vivíronse as dos traballadores de Alcoa-- nada como o acontecido a comezos de agosto do 2012. Nunha desas xornadas, traballadores funcionados convocados pola CIG, Satse, UGT e CCOO  cortaron durante máis dunha hora a rúa do Hórreo para logo tentar entrar á forza no Parlamento.

No interior da cámara estaba a ter lugar a votación na que o PP de Feijóo aprobaría o recorte da paga extraordinaria de decembro aos funcionarios públicos, medida que aplicaba a instancias do Goberno de Rajoy e que lle valeu fortes acusacións de "sumisión" por parte dos alí presentes. Ao final, o tirapuxa dos concentrados coa policía saldouse con pouco máis que algúns ovos escachados contra as xanelas do pazo do Hórreo.

ALCALDES "FORCEXANDO" CONTRA A POLICÍA

O resto de incursións notables na Cámara recollidas nos últimos anos tiveron lugar a través da tribuna de invitados. Esta socorrida vía para montar lea no interior do Parlamento foi aproveitada por axentes de moi diverso cariz ideolóxico e intencións. No 2013, unha protesta de traballadores do naval galego --convocados por AGE-- conseguiu frear durante dez minutos o pleno da cámara.

Máis célebre foi a interrupción protagonizada por uns 200 altos cargos do PP que, en 2005, se congregaron ás portas do edificio --dentro do recinto-- e, segundo relatou entón El País, "forcexaron" con axentes de Policía para que se lles permitira entrar. Entre a masa contábanse 100 alcaldes da comunidade, así como senadores estatais e concelleiros. O PP de Fraga chegara a acreditar a varias ducias dos sublevados para que puideran trasladar as protestas á tribuna de invitados, pero a presidenta da cámara impediuno ao adiviñar as intencións do partido. Feijóo, por aquel entón voceiro adxunto, advertiu que "estudarían medidas legais" por querer "amordazar" a oposición.

MARIÑEIROS PECHADOS NA CÁMARA

Paralelo foi o caso dos mariñeiros que, en 2014, trasladaron ás portas do Parlamento para protestar pola redución das cotas pesqueiras. A concentración, que non fora autorizada, resultou repelida con duras cargas policiais que a Delegación do Goberno --entón en mans do PP-- xustificou a actuación policial atendendo á "seguridade" dos parlamentarios. 

Galicia Confidencial recollía entón unha versión ben distinta dos feitos, por parte dun dos mariñeiros afectados. "Chegaron como animais. Pegaronlle a unha muller que non tiña nada que ver coa historia e tirarona no chan. Entraron no bar a mallar e iso non o poden facer. Ata lle deron á camareira do bar. Isto no País Vasco non o fan. Tiran pelotas a menos de 200 metros. Imaxinate se pasa unha criatura por ahí".

Nunha desas tensas xornadas de mobilizacións, un reducido grupo de manifestantes conseguiu acceder á cámara, tralo cal se pecharon nunha das salas do Parlamento pedindo unha audiencia con Feijóo e a dimisión da Conselleira do Mar, que xa entón era Rosa Quintana. Finalmente foron expulsados do Hórreo baixo a promesa de poder regresar para "seguir negociando unha saída", tal e como recollía entón GC.