Hosteleiros apostan por crear unha federación galega para evitar o control da Xunta sobre o Cluster do Turismo

Os problemas nas negociacións para chegar a un acordo sobre un fondo covid para a hostalaría están provocando malestar entre os hosteleiros que están agrupados en diferentes asociacións, precisamente, polo control e a afinidade que hai entre o Goberno galego e o Cluster do Turismo. Por iso, este venres secundan unha protesta que marchará polas rúas de Compostela, ata o complexo administrativo de San Caetano.

Na tarde do xoves presentouse, precisamente, unha plataforma que engloba a unhas 2.000 empresas e que pretende ser o xerme dunha federación galega para dar "unidade" ao sector ante a "fragmentación asociativa" que asegura que sofre, nun panorama no que atribúe un "marcado carácter presidencialista" ás organizacións existentes e proximidade dos posicionamentos do Cluster cos da actual Xunta. Unha crítica que este xoves fixo patente o alcalde vigués quen falou abertamente de "afinidade" entre o presidente do Cluster co PP, tras insistir o presidente da Xunta en que asumen a proposta deste organismo.

NOVA PROPOSTA

Por outra banda, a federación galega de municipios e provincias (Fegamp) e as deputacións da Coruña, Lugo e Pontevedra remitiron ás partes presentes na negociación novas propostas para o fondo común de rescate á hostalaría fronte á crise da covid horas antes de que se celebre unha nova reunión en Santiago.

Como ao longo de toda esta semana, as contías que poña cada entidade e quen xestionará eses recursos son os dous principais puntos de desencontro entre estes representantes da administración local e a Xunta (xunto ao Cluster Turismo de Galicia, que convoca os encontros e está aliñado co parecer do Goberno galego).

A Fegamp destaca que "subscribe o método do sistema da Comunidade de Valencia, que propuxo adoptar a Xunta de Galicia e que establece a xestión do fondo a través dos concellos". "Respecto da preocupación dos representantes de turismo e hostalaría polas diferenzas nos prazos de execución segundo as distintas localidades, o procedemento da Comunidade Valenciana e fórmulas xa en práctica en distintos municipios e solicitadas pola Fegamp permiten a concesión destas axudas en cuestión de días", defende.

FONDO ADICIONAL PARA CONCELLOS QUE NON CONTRIBÚAN

Así mesmo, a federación indica que "coincide co modelo valenciano en que a repartición do fondo debe realizarse exclusivamente entre os concellos contribuíntes, para que os seus veciños se beneficien do esforzo dos impostos que pagan".

Con todo, en base ao principio de solidariedade, a Fegamp pide á Xunta "que habilite un fondo adicional para aqueles concellos que demostren a súa incapacidade para achegar diñeiro ao plan de axudas común".

DEPUTACIÓNS

Pola súa banda, o tres deputacións con bipartito PSOE-BNG sinalaron a última hora do xoves que manteñen "a necesidade" de que cada administración destine o 1% dos seus orzamentos ao fondo conxunto, e cualificaron tamén de "irrenunciable" que os recursos "sexan xestionados polos municipios".

PP

Pola súa banda, o Partido Popular mobilizou aos seus alcaldes para reclamar que sexa a Xunta a que xestione "de novo" as axudas do segundo plan de rescate ao sector hostaleiro fronte á crise da covid-19.

En declaracións remitidas aos medios de comunicación polo PP de Lugo, o rexedor de Sober, Luís Fernández Guitián, destaca que "o que necesita o sector hostaleiro é axilidade na resolución dos seus problemas".

Tamén o vicepresidente primeiro da federación galega de municipios e provincias (Fegamp), Alfonso Villares, do Partido Popular, avoga por que sexa a Xunta a que xestione as axudas do segundo plan de rescate á hostalaría fronte á crise da covid-19.

A través dun comunicado, o tamén alcalde de Cervo (Lugo) advirte de que no seo da Fegamp "non todos" opinan o mesmo en relación coa xestión dos fondos, fronte ás afirmacións trasladadas polo seu presidente, Alberto Varela, partidario de que sexan os concellos os que tramiten estes recursos.