O Goberno recibe ás vítimas de Angrois 4 días antes da inauguración do AVE e 5 meses despois de que o pediran
Os afectados ven "inaceptable" este acto "aos catro ventos" tras oito anos "sen a investigación técnica independente que reclama a UE".
Por Europa Press / Redacción | SANTIAGO DE COMPOSTELA | 15/12/2021 | Actualizada ás 11:26
A ministra de Transportes, Raquel Sánchez, convocou á plataforma de vítimas do accidente ferroviario do Alvia, que ocorreu en 2013 en Angrois, para este xoves ás 10,30 horas na sede do seu departamento. Esta reunión producirase a catro días da viaxe inaugural do AVE a Galicia. Hai cinco meses que esta asociación se dirixiu á nova ministra para solicitarlle que se reunise con eles e ata agora queixábanse de que "nin sequera" se tiña "dignado" en contestar.
Por iso, o pasado 22 de novembro, coincidindo cunha viaxe en probas tamén da alta velocidade a Galicia, varios dos representantes da plataforma desprazáronse ata Chamartín (e tamén á estación de Ourense). En Madrid, entregáronlle unha carta en persoa.
En concreto, foi o portavoz das vítimas do Alvia Arturo Domínguez quen deu un escrito a Raquel Sánchez. Nel, as vítimas esixíanlle unha investigación independente do ocorrido, como reclama Europa, xa que ata agora só existe unha oficial que culpa unicamente ao maquinista.
Sánchez recibiu o documento xa na plataforma, antes de subirse ao tren, e trasladou a Domínguez que está á beira dos afectados, ao que este respondeulle con reproches por que non lles recibiu aínda.
Na curva da Grandeira, o 24 de xullo de 2013, morreron 80 persoas tras un descoido do maquinista polo que van ir a xuízo (previsto para comezos de 2022) tanto o condutor como o exresponsable de seguridade de Adif, ao entender o instrutor que a análise de risco da liña foi deficiente.
PETICIÓNS
Segundo informan este mércores nun comunicado, os afectados trasladarán á ministra este xoves varias "reivindicacións e preocupacións", como o cesamento "inmediato" do actual presidente da Comisión Investigación de Accidentes Ferroviarios (CIAF), Fernando Montes Ponce de León, "ante a negativa de levar unha investigación técnica independente tal e como esixe a UE". Consideran que está "a incumprir as obrigacións propias do cargo".
En segundo lugar, ven "inaceptable" que, tras oito anos sen a investigación técnica independente que reclama a UE, o vindeiro luns 20 "vaian inaugurar aos catro ventos o novo tramo da liña de alta velocidade Madrid-Galicia". "Era e é obrigación do ministerio garantir que leve a cabo esta investigación nos termos legalmente establecidos. Para iso esixiremos á ministra unha reforma estrutural dos membros da CIAF por non cumprir coa súa obrigación de investigar e en aras de garantir a súa independencia", subliñan.
Ademais, móstranse "moi preocupados polos procedementos de infracción, que case tres anos despois, continúan abertos por Bruxelas debido a que 'os procesos de seguridade en España non cumpren os requisitos da lexislación da UE sobre seguridade ferroviaria".
