Última hora: Casaio segue en alerta polo lume, con xornadas "infinitas" de veciños e dano á súa biodiversidade

A aldea de Casaio, en Carballeda de Valdeorras, continúa en alerta polo lume que entrou en Galicia tras cruzar a fronteira con Zamora o pasado fin de semana. Veciños e voluntarios levan días combatendo o incendio con xornadas “infinitas”, á espera de máis medios. O lume entrou no Teixadal de Casaio, un bosque único con teixos centenarios, e danou parte da súa biodiversidade. Agora a principal preocupación é que cruce o río San Xil e ameace o núcleo poboacional.

Pedro Domínguez, veciño de Casaio e dono do albergue Eco dos Teixos, explica que no Teixadal quedan focos “pequenos e dispersos” que se reavivan con facilidade. Pide máis medios aéreos para evitar que as lapas cheguen preto das casas. O incendio comezou en Porto (Zamora) o xoves e o sábado xa avanzara ata as montañas de Trevinca. Veciños como Domínguez e o guía local Juanjo Lorenzo alertaron da situación a través das redes, e critican que a Xunta non informase publicamente do lume ata o martes, a pesar de coñecelo desde o sábado.

Segundo a Xunta, o incendio afectou a 2.600 hectáreas en Galicia, aínda que Lorenzo eleva a cifra a 4.000. Denuncia que ardeu boa parte do val do río Xares e lamenta que “o mellor que tiñamos en Galicia” se perdera sen reacción suficiente. As brigadas, bulldozers e avións FOCA comezaron a traballar o xoves, logrando que o lume estea “controlado”, pero os danos xa son importantes. Para os veciños, a prioridade segue sendo protexer o Teixadal e evitar que a situación empeore.

O Teixadal, que conserva teixos centenarios e mesmo milenarios, sufriu danos na súa biodiversidade, aínda que as árbores principais non resultaron gravemente afectadas. Domínguez describe como o lume arde “por baixo” e vai queimando o interior das árbores e especies como a Lobaria pulmonaria. Veciños e voluntarios especializados, incluídos membros de Sputnik Labrego, traballan a contrarreloxo en zonas de difícil acceso para apagar focos reavivados e sanear a terra, coa esperanza de que as lapas non crucen o regacho do Penedo, onde está a maior concentración de teixos.

CARBALLEDO SAE DA SITUACIÓN 2

A Consellería do Medio Rural desactivou a situación dúas de emerxencia no incendio forestal que afecta o municipio lucense de Carballedo. Este incendio forestal comezou na noite do xoves na porrquia de Cova e de forma preventiva evacuaron o Albergue de Vos Peares. Un total de 53 nenos e 11 monitores foron trasladados ao albergue xuvenil Lugo. A onda de incendios que desde hai dúas semanas afecta a Galicia non dá tregua e calcina xa 88.311,5 hectáreas en lumes non apagados.

INCENDIO VILABOA, UN SOSPEITOSO

A Garda Civil e a Policía Adscrita da Policía Nacional (Policía Autonómica) avanzan na investigación sobre a orixe do incendio activo no municipio pontevedrés de Vilaboa, e segundo fontes consultadas por Europa Press, as pescudas están canalizadas e estréitase o cerco sobre unha persoa sospeitosa de estar tras este lume.

As chamas iniciáronse na tarde deste xoves e o incendio, que segue activo e arrasou unhas 50 hectáreas polo momento, obrigou a decretar a situación 2 pola proximidade do lume a zonas habitadas. De feito, na noite do xoves procedeuse á evacuación de 14 persoas na zona de Paradellas.

Con todo, segundo avanzaba o alcalde de Vilaboa, César Poza, os veciños afectados xa foron autorizados a regresar ás súas casas. Para a extinción do incendio foron mobilizados 3 técnicos, 10 axentes, 19 brigadas, 19 motobombas, 1 pa, 1 unidade técnica de apoio, 4 helicópteros e 8 avións. Nos traballos participan efectivos da Unidade Militar de Emerxencias (UME).

INCENDIO DE LAROUCO

Xusto cando se cumpre unha semana da entrada do incendio de Larouco en terras de Quiroga (Lugo), os técnicos empezan a dar por estabilizado o lume, no que xa non hai chama. Así o explicou este venres o concelleiro de Medio Ambiente, Luís Manuel Arias, quen asegurou que xa non hai puntos quentes, pero está a procederse a refrescar toda a zona para evitar que se volvan a activar focos.

Este mesmo incendio achegouse ás portas do termo municipal de Folgoso do Courel, que xa sufriu outra onda de proporcións históricas en 2022, pero non chegou a entrar grazas ao traballo das brigadas durante días abrindo gabias e na xornada de onte cos operativos traballando con medios aéreos durante todo o día.

A situación está tamén "bastante estabilizada" en Folgoso do Courel, nas dúas frontes que tiñan abertos (o outro por León) e onde se segue vixiando atentamente en dous puntos cruciais, Outeiro e Ferramulín, para evitar que as chamas volvan activarse. O maior temor está na subida das temperaturas prevista para este fin de semana, "que podería cambiar a situación nun momento".

Agora mesmo, os labores principais están centrados en refrescar todo o terreo queimado desde Larouco, que ten unha extensión de 170 quilómetros de perímetro, segundo as estimacións que manexa o responsable municipal quirogués.

CARBALLEDO E OS PEARES

En Carballedo, preto do encoro dos Peares, a situación tamén está "bastante controlada", segundo explicou o seu alcalde, Xullo Yebra-Pimentel. O lume, un foco novo, iniciouse a media tarde do xoves e declarouse a Situación 2 como medida preventiva porque había un pobo ameazado, Oleiros. En poucas horas as chamas controláronse, pero volveron rexurdir pola noite pondo en perigo tamén a outra pequena localidade desta parroquia de Cova, Papelle.

Este mediodía, o alcalde afirmou estar "tranquilo" porque hai un gran operativo, con medios aéreos e buldócer traballando na zona. "Agora mesmo non hai perigo para ningunha das dúas localidades, aínda que hai que estar vixiantes", agregou o mandatario, que se mantén na zona de risco, en Papelle, onde o incendio non está lonxe pero "hai moita xente traballando e estamos tranquilos", agregou.

OIA E VILABOA

Esta pasada noite novos focos obrigaron a desaloxar a máis dun centenar de persoas nos municipios pontevedreses de Oia e Vilaboa e no lucense de Carballedo.

A estrada PO-552 ao seu paso pola zona de Mougás, en Oia, foi reaberta ao tráfico á primeira hora deste venres, tras varias horas de corte debido ao incendio que afecta a esta parroquia. Fontes do 112 Galicia confirmaron a reapertura desta vía desde as 6,45 horas desta mañá, mentres seguen na zona os medios de extinción para tratar de controlar o incendio declarado na tarde deste xoves e que, polo momento, arrasou unhas 40 hectáreas, segundo datos da Consellería do Medio Rural.

Este incendio obrigou a decretar a situación 2 de alerta nas últimas horas como medida preventiva, pola proximidade das chamas a núcleos habitados, aínda que dita alerta xa se desactivou. Igualmente, como medida de precaución foron desaloxadas 45 persoas dun cámping, pero xa puideron regresar ás instalacións (no entanto, algunhas quedaron aloxadas no Cámping Santa Tegra da Guarda). Para a extinción deste lume, os medios mobilizados (acumulados) foron 2 técnicos, 7 axentes, 11 brigadas, 13 motobombas, unha pa, un helicóptero e 2 avións.

INCENDIO DE VILABOA

Mentres, o incendio forestal que afecta a Santa Cristina de Cobres, en Vilaboa segue tamén activo e cunhas 50 hectáreas de terreo calcinadas, segundo Medio Rural. Nese caso, o lume comezou tamén na tarde deste xoves e, entre os medios de extinción e control despregados, atópanse efectivos da Unidade Militar de Emerxencias (UME) do Exército.

Neste incendio mantense activada a situación 2 de alerta pola proximidade do lume a zonas habitadas e, de feito, foi necesario desaloxar o número de Paradellas (14 persoas). Con todo, segundo confirmou o alcalde de Vilaboa, César Poza, a Europa Press, desde a pasada madrugada os veciños xa teñen permiso para regresar ás súas casas. "Onte facíase insufrible estar alí, sobre todo polo fume", explicou o rexedor.

A Xunta informou de que os medios acumulados neste incendio son 3 técnicos, 10 axentes, 19 brigadas, 19 motobombas, 1 pa, 1 unidade técnica de apoio, 4 helicópteros e 8 avións.

ESTADO FERIDOS

Os tres brigadistas e o bombeiro feridos durante os operativos de extinción dos incendios forestais en Ourense continúan ingresados no Complexo Hospitalario Universitario da Coruña con prognóstico grave e moi grave. No entanto, melloran en canto ás consecuencias por inhalación de fume.