(Vídeo) Veciños de Casaio organizados contra os incendios: "Temos xente preparada para evitar que entre na aldea"

Veciños da aldea de Casaio, en Carballeda de Valdeorras, permanecen desde o luns organizados fronte ao incendio que afecta as montañas de Trevinca tras cruzar a fronteira galega con Zamora desde Porto, na comarca de Sanabria, onde se orixinou o lume o xoves 14 de agosto.

Pasada xa unha semana, vixían a zona do río San Xil, á que, de chegar, o lume podería cruzar á aldea tras escalar unha ladeira. "Levamos todo o día mirando que non o pase", sinala a Europa Press uno dos veciños de Casaio, Pedro Domínguez. O lume que se dirixe cara a Casaio colleu "moita forza" na tarde do sábado. "Pola tarde desmadrouse. A fronte que viña cara a Casaio, no Pico Maluro --na zona que divide os concellos da Veiga e Carballeda--, do noso lado colleu moita forza pola tarde e abriu unha fronte moi grande", relata.

Isto xerou "preocupación" na aldea, que foi escalando ao longo da semana. "Sentía moita xente máis alá das 00.00 horas na praza falando. A xente está nerviosa", describe. Neste momento, o incendio avanza cara ao río San Xil, ata onde se desprazaron algúns veciños. "Estiveron a tentar facer algo, pero por terra é un pouco complicado", apunta Domínguez. Alí hai, ademais, dous helicópteros descargando. "A situación é que non pase o río San Xil cara a Casaio porque senón iría ladeira cara arriba, collería moita forza e achegaríase á aldea", teme.

"Levamos todo o día mirando que non pase o río", explica Domínguez. Esta vixilancia levou a que haxa "xente preparada" nunhas pistas en dirección á aldea". Domínguez apunta a presenza "bastantes medios", como unha bulldozer, unha brigada aerotransportada e unha brigada de terra, así como o apoio de ao redor de 30 e 40 veciños.

 

 

 

 

View this post on Instagram

 

 

 

 

 

 

 

 

 

 

 

A post shared by Galicia Confidencial (@galicia_confidencial)

TEIXADAL DE CASAIO

Unha das preocupacións durante toda a semana foi a posible afectación ao Teixadal de Casaio, bosque de teixos centenarios e algún milenario. Finalmente, o lume entrou nel e, aínda que non danou os teixos e o prexuízo non foi "extremo", a gran biodiversidade do monte si padeceu: entre ela, árbores e líquenes calcinados.

A xornada do sábado foi a última na que veciños e voluntarios acudiron ao Teixadal. Domínguez explica que ata el se desprazaron un grupo de oito persoas, entre as que había tamén veciños da Veiga, organizadas para cubrir a maior parte do bosque. "Fomos extinguindo todo o posible. Quedou bastante saneado", asegura. Agora, a fronte "tan grande" orixinado o sábado convértese na prioridade principal do pobo. "A zona do Teixadal quedou bastante tranquila e saneada", traslada Domínguez.