Deteñen a un veciño de Toques como presunto autor dun incendio forestal en Melide

O Servizo de Protección da Natureza (SEPRONA) da Comandancia da Garda Civil da Coruña, en colaboración con outras unidades da Comandancia, detivo a un veciño de Toques como presunto autor dun delito de incendio forestal.

O lume que se lle acusa de provocar foi declarado o martes 19 de agosto no lugar de Ponte Mazairas-San Pedro (Melide), segundo informa o Instituto Armado. A Garda Civil iniciou unha investigación en aras do esclarecemento das causas do mesmo e a identificación do autor ou autores no seu caso.

Tras a análise da información solicitada, os gardas civís actuantes lograron a identificación do presunto autor do ilícito. Unha vez coñecida a identidade, procedeuse á súa detención. O individuo, xunto coas actuacións realizadas foi posto a disposición do Xulgado de Instrución de garda de Arzúa.

SANCIÓNS

Por outra banda, a Garda Civil da Comandancia da Coruña propuxo para sanción a tres persoas por incumprir as restricións de seguridade nunha época de alerta máxima por risco de incendio forestal.

Dous delas eran veciños de Santiago de Compostela que realizaban unha grellada en Muxía e a terceira, un veciño de Irixoa que facía unha queima de restrollos nunha leira particular. O importe económico destas infraccións oscila entre 1.001 e 1.000.000 euros.