Sobe un 3,6 % o prezo medio dos veículos usados en Galicia en agosto, ata os 12.136 euros
Por Europa Press / Redacción | SANTIAGO DE COMPOSTELA | 08/09/2025 | Actualizada ás 10:30
O prezo medio dos vehículos de ocasión en Galicia creceu un 3,6 % no mes de agosto, con respecto ao mesmo mes do ano pasado, ata situarse nos 12.163 euros, segundo os datos feitos públicos este luns pola Asociación Nacional de Comerciantes de Vehículos (Ancove).
En termos mensuais, o prezo dos vehículos usados creceu un 0,8 % con respecto ao mes de xullo. Así, nos coches máis antigos (os de máis de 8 anos), o prezo medio situouse nos 9.915 euros, un 6,8 % máis que hai un ano; mentres que a subida con respecto ao mes anterior foi do 0,9 %.
Segundo sinalou Ancove, no mes de agosto vendéronse 8.300 vehículos usados en Galicia, cun prezo medio de 12.163 euros, e o prezo medio máis elevado rexistrouse na provincia da Coruña, aínda que foi a de Ourense onde se produciu a maior subida (un 8,9 %).
Así, na provincia da Coruña, vendéronse 3.290 unidades, a un prezo medio de 12.498 euros (+5,5 %); en Lugo foron 1.148 vehículos cun prezo medio de 12.234 euros (+2,9 %); en Ourense, rexistráronse 930 vendas e o prezo medio foi de 11.688 euros (+8,9 %); e en Pontevedra houbo 2.932 transaccións cun prezo medio por vehículo de 11.910 euros (+0,5 %).
