CIG responde a Paula Prado (PPdeG): "o material enviado aos centros está dentro dos currículos escolares"

A CIG-Ensino respondeu á secretaria xeral do PPdeG, Paula Prado, que o material didáctico enviado aos centros está "plenamente imbuído dentro dos contidos curriculares e dos obxectivos marcados polo marco lexislativo educativo".

Unha contestación que chegou despois de que Prado advertise este xoves que a súa formación non está disposta a consentir "o adoutrinamento de CIG e BNG nas aulas", tras denunciar que o sindicato remitiu cartas a centros educativos galegos nas que propoñen o uso de materiais que, ao seu modo de ver, teñen esa intención e "en aras da conflitividade social".

Tal e como sinalou o sindicato nun comunicado, non enviou ningunha carta aos centros, senón que mandou un correo ao profesorado pondo á súa disposición material para abordar, entre outras cuestións, a situación do pobo palestino ou os efectos dos incendios e das industrias contaminantes no territorio.

Ditos materiais, dispoñibles na web da CIG-Ensino, pretenden "fomentar a perspectiva crítica do profesorado" e responden os obxectivos enunciados no preámbulo da LOMLOE de buscar unha "maior participación e recoñecemento no currículo dos movementos sociais que a crise impulsou, así como atender ao desenvolvemento sustentable de acordo á Axenda 2030".

"A educación inclúe a educación para a paz e os dereitos humanos; comprensión internacional; educación intercultural, así como a educación para a transición ecolóxica, sen descoidar a acción local, de modo que o alumnado coñeza as consecuencias que teñen as accións diarias no planeta", amplía o preámbulo.

Nesta liña, apunta a CIG, tal e como se recolle nun dos recursos didácticos dedicado a Palestina, os Decretos que ordenan os ensinos da Educación Secundaria Obrigatoria e do Bacharelato en Galicia "inclúen múltiples referencias en diversas materias aos dereitos humanos, aos xenocidios e á necesidade de tomar conciencia dos conflitos producidos e que se producen actualmente na Idade Contemporánea".

Tamén, nestas normas indícase ademais que a programación docente "debe abarcar a prevención da violencia terrorista e de calquera forma de violencia, racismo ou xenofobia". Con todo, a CIG reafirmou que todos os materiais didácticos postos a disposición do profesorado "enmárcanse na lexislación educativa vixente" e acusou a Prado de querer "enfrontar ás familias co profesorado" cunhas declaracións que son unha "absoluta irresponsabilidade".

Rolda de prensa da CIG (de izq. A der.):Manuel G. Moreira, Laura Arroxo e Luís Carballo. CIG