Sanmartín acusa o PP de incoherencia polas críticas pola vertedura ao Sar

A alcaldesa de Santiago, Goretti Sanmartín, respondeu este venres ás críticas do PP pola vertedura ao río Sar vinculada ás obras da nova depuradora da Silvouta. A rexedora afirmou que o Concello “actuou desde o primeiro momento” e que, tras recibir o informe da comisión de seguimento, trasladou toda a información aos concellos afectados.

Sanmartín cualificou as acusacións populares de “estrañas” e “pouco intelixibles”, lembrando que o atraso na construción da depuradora “é responsabilidade do PP”. Tamén destacou que o Concello mantivo contacto permanente con Acuaes e Augas de Galicia, entidades competentes na materia, e que a relación institucional é “moi boa”. En resposta ao edil popular Adrián Vila, que lle pediu “recitar o cronograma da súa inacción”, a alcaldesa ironizou: “Sería mellor que lese máis poesía, porque o Partido Popular, o da limpeza dos ríos, non se lles dá moi ben”.