O BNG presume de gobernos municipais co rexedor de Pontevedra como modelo

A portavoz nacional do BNG, Ana Pontón, reivindicou o "proxecto sólido e solvente" dos gobernos municipais da formación nacionalista en Galicia como "carta de presentación" e "aval" de cara ás próximas eleccións municipais de 2019, nas que avanzou que "irán a por todas" e mostrarase aos cidadáns que existe unha "alternativa" de cara a "desaloxar ao PP" da Xunta de Galicia.

Ana Pontón presidiu en Santiago un encontro con case 300 cargos municipais nacionalistas co obxectivo de "pór a punto a estratexia para as próximas eleccións municipais". Así, asegurou que o BNG conta cun "proxecto claro, definido e solvente", que ten como "mellor carta de presentación" a xestión realizada nos concellos nos que gobernan, que conseguiron, engadiu, "transformar".

Nesta liña, nun acto no que en primeira liña estaba o alcalde de Pontevedra, Miguel Anxo Fernández Lores, quixo pór en valor o "exemplo" que supoñen "hoxe non só a nivel galego senón a nivel internacional" os municipios gobernados polo BNG en canto a reformas urbanas, modelos nos que se priorizan as persoas sobre os vehículos, nos que "se mellora a calidade de vida da xente", "poténciase o comercio local como fonte de emprego e dinamización social" ou se consegue que os veciños se "beneficien do feito de ter o maior número de eólicos por habitante do Estado abaratando a factura da luz, como en Muras".

Con este punto de partida, Ana Pontón avanzou que a formación nacionalista "irá a por todas" nunhas eleccións municipais de 2019 nas que se "traballará desde a humildade" pero "tamén desde a convicción" de dispor de "un proxecto sólido", co "aval dos gobernos municipais do BNG" e "o aval de que os galegos e galegas teñen no Bloque Nacionalista Galego a unha forza política na que poder confiar", porque está "preparada para gobernar os Concellos".

"DESALOXAR" AO PP DA XUNTA DE GALICIA

Pontón insistiu na importancia das próximas eleccións municipais para a formación política, que situou como "a base sobre a que poder darlle unha alternativa aos cidadáns para desaloxar ao PP da Xunta de Galicia".

Os nacionalistas encaran, aseverou, "con todo o optimismo o proceso de elaboración da estratexia" de cara ás municipais, sobre a base dun "proxecto sólido" que se renovará con "novas ideas e alternativas" e que recollerá "a bagaxe de todos estes anos de experiencia nos municipios do BNG", en localidades que, engadiu Ana Pontón, "funcionan razoablemente ben", con "ideas innovadoras" e que os sitúan "no mapa da modernidade.

A portavoz nacional do BNG aludiu tamén ao "modelo propio que funciona desde a confianza nas capacidades deste país" e "que non necesita copiar o que vén de Madrid" e que sostén que os cidadáns xa puideron percibir nas localidades nas que conta con responsabilidade de goberno, como "Allariz e Pontevedra, Carballo, Rianxo, Tomiño, Bueu, San Sadurniño, A Mezquita ou Castrelo de Miño".

Con ese aval, Pontón animou aos concelleiros e ao conxunto da militancia a "porse ao choio" na preparación das eleccións e a "saír a por todas e sen complexos". A dirixente nacionalista felicitou aos responsables municipais polo seu "esforzo e dedicación" e engadiu que "hoxe non hai ningunha forza política que poida presentar un balance de goberno como o do BNG, non é froito da casualidade senón dun proxecto político que funciona desde a confianza no país".

A xornada de traballo contou coa participación do vicepresidente da Deputación de Pontevedra, César Mosquera, da alcaldesa de Tomiño, Sandra González, e do secretario de Comunicación, Xavier Campos, seguida en cada caso dun debate e posta en común de ideas por parte dos responsables municipais.