A prensa galega minimiza a defensa da sanidade pública en Galicia e entrégase ao 'pinchazo' do unionismo español en Madrid

Os diarios en papel galegos dedicaron, en conxunto, un 26% do seu espazo de portada á manifestación convocada pola dereita e ultradereita en Madrid, e tan só un 4% á celebrada en Santiago de Compostela contra os recortes e privatización da sanidade galega.

Por Galicia Confidencial | Santiago de Compostela | 11/02/2019 | Actualizada ás 12:57

Comparte esta noticia

Un 26% do espazo total das portadas en papel para a manifestación unionista española na Plaza de Colón de Madrid, contra tan só un 4% para a protesta en Santiago de Compostela en defensa da sanidade pública galega. A prioridade para a prensa tradicional galega é máis que evidente: centrar o debate público na cuestión da defensa da unidade de España e reducir o impacto na opinión pública do principal problema social en Galicia, a crise da sanidade pública.

Portadas de La Voz de Galicia e Faro de Vigo do 11 de febreiro de 2019.
Portadas de La Voz de Galicia e Faro de Vigo do 11 de febreiro de 2019.

O espazo dedicado a unha manifestación e outra non deixa lugar a dúbidas do posicionamento ideolóxico dos vellos xornais: un 4% para a crise na sanidade galega e unha cuarta parte do espazo conxunto de todas as cabeceiras para a manifestación convocada pola dereita (PP e Ciudadanos) e ultradereita (Vox), e secundada por grupos fascistas e neonazis (acudiron Falagande Española de las JONS, Hogar Social e España 2000). Unha convocatoria que resultou ser un fracaso, xa que só puideron congregar unhas 45.000 persoas (datos oficiais), moi lonxe doutras masivas manifestacións que se teñen celebrado en Madrid ou en Barcelona en defensa dos dereitos civís, con centos de miles de participantes.

A maior parte dos medios en papel galegos dedicaron o seu espazo central á manifestación convocada pola dereita e ultradereita. As portadas de La Voz de Galicia, El Correo Gallego, Faro de Vigo e Atlántico Diario son as máis expresivas, con enormes bloques en portada e grandes fotografías para a convocatoria reactiva en Madrid contra o Goberno de Pedro Sánchez. No caso destes catro xornais, Faro é o único que ilustra cunha imaxe a manifestación en Santiago en defensa da sanidade galega, pero no faldón, minimizada pola manifestación de Colón. En La Voz, El Correo e Atlántico nin sequera mereceu unha fotografía para os seus editores e ocupou un espazo minúsculo nas súas portadas.

A manifestación da dereita e ultradereita españolista tamén ocupou a parte central das portadas de Diario de Pontevedra e El Progreso de Lugo —do mesmo grupo mediático—, compartindo protagonismo con eventos deportivos. Neste caso, non usaron imaxes da manifestación en Colón, pero foi o titular principal de portada. E ao igual que os anteriores, reduciron ao mínimo a manifestación en Santiago de Compostela.

La Región de Ourense e La Opinión da Coruña suscitan unha análise ben diferente. No caso do xornal ourensán, sorprende que non incluíu na portada referencia algunha á manifestación pola defensa da sanidade galega e foi o xornal en papel que menos espazo dedicou á de Madrid, aínda que si con fotografía e nun espazo central.

La Opinión da Coruña apostou pola ecuanimidade, relegando ambas as manifestacións ao faldón da portada, co mesmo formato —con imaxe— e espazo para ambas as protestas.

En definitiva, o principal problema social de Galicia foi minimizado para exhibir a "España de las banderas y los balcones".

En vermello codificouse o espazo dedicado á manifestación unionista española en Madrid e en verde, a protesta en defensa da sanidade galega en Santiago de Compostela.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 7 comentarios

7 Sanitario

«O espazo dedicado a unha manifestación e outra non deixa lugar a dúbidas do posicionamento ideolóxico dos vellos xornais». Que conclusión máis gratuíta, Galicia Confidencial. Facede unha análise seria de todo o que teñen publicado os «vellos xornais» sobre a crise da sanidade pública, anda, e despois xa opinades. ¿Como se reflicte unha manifestación concreta (bastante limitadiña por certo, moitísimo menor das dúas últimas que houbo en Vigo) na portada «non deixa lugar a dúbidas do posicionamento ideolóxico? Vaia asco de periodismo estades fomentando.

6 tino

os palanfletos subvencionados corruptos, pepeiros e antigalegos xa se sabe

5 bautista do unto

Para eso recibe subvencións da Xunta de Galicia

4 uu1

Surpresa!! Estes diários são financiados com o BOG e a publicidade institucional, e o melhor de tudo isto, é que é legal.

3 Galeguiña

En vista do "pinchazo", é o momento de convocar eleccións, como dixo o presidente máis honesto que tivemos nunca en España (agás Zapatero, claro). Seguro que os partidos de esquerda xunto a nacionalistas e independentistas, arrasan nas votacións. Eleccións xa!