Por Europa Press / Redacción | SANTIAGO DE COMPOSTELA | 06/06/2019 | Actualizada ás 18:17
O ministro de Fomento en funcións, José Luís Ábalos, afirmou que recibirá ás vítimas do accidente do tren Alvia, ocorrido fai agora case seis anos na curva de Angrois, en Santiago, "cada vez que faga falta".
Así se pronunciou a preguntas dos xornalistas este xoves en Estrasburgo, despois de que a plataforma de afectados o sinistro acudise ao Defensor do Pobo Europeo para reclamar que haxa unha investigación independente sobre as causas do descarrilamento, no que morreron 80 persoas e 144 resultaron feridas.
O maxistrado que instruíu o caso (aínda por xulgar) atribúe 80 supostos delitos de homicidio e 144 de lesións por imprudencia profesional grave tanto ao maquinista polo seu descoido como ao que entón era responsable de seguridade de Adif, pola deficiente análise que fixo o seu departamento na liña.
Este xoves, coincidindo coa reunión que as vítimas mantiñan coa presidenta de Adif, Isabel Pardo de Vera, o titular de Fomento en funcións foi interrogado sobre se pensa entrevistarse coa plataforma. "Eu recibinos", limitouse a responder, antes de ratificar que o fará "cada vez que faga falta".
De feito, con quen leva meses solicitando manter un novo encontro a asociación de afectados é con Ábalos, pero nas últimas semanas foi a presidenta de Adif a que lles trasladou a súa vontade de verse con eles.
Á marxe da causa xudicial e as eventuais consecuencias penais, no plano político (no que as vítimas tamén reclaman depuración de responsabilidades), a comisión de investigación do Congreso dos Deputados terminou os seus traballos sen chegar sequera a empezar a redactar as súas conclusións sobre o accidente, ao disolverse as Cortes co adianto electoral.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.