A oposición ourensá reclama ao Concello que reactive o plan de mobilidade 'Móvete por Ourense'

O tres grupos municipais que conforman a oposición no Concello de Ourense (PSOE, BNG e Cidadáns) chegaron a un acordo para presentar unha moción conxunta para o próximo pleno que insta o goberno á reactivación do proxecto 'Móvete por Ourense'.

Con esta iniciativa aspiran a conseguir o "consenso e compromiso" do goberno de coalición da cidade (DO e PP). "Un compromiso que vaia máis aló das palabras e se concrete nunha reunión inmediata da comisión de seguimento", manifestou o portavoz municipal socialista, Rafael Rodríguez Villarino.

Así mesmo, a oposición insta o goberno local a que destine os "recursos orzamentarios necesarios" para facer realidade as 21 medidas que compoñen o proxecto 'Móvete por Ourense' e "delimite as actuacións" que levarán á práctica. Os portavoces do tres grupos municipais coincidiron en sinalar a súa aposta pola mobilidade na cidade, un tema que consideraron de "máxima relevancia".

O portavoz de Cidadáns, José Araújo, lembrou que "do que se trata é de dicirlle á sociedade e ao goberno municipal" que están "dispostos a apoiar un cambio radical da mobilidade da cidade, unha definición inherente ao que significa o Plan 'Móvete por Ourense".

"Estamos a falar dun documento que marca as liñas a seguir para lograr un proceso de humanización da cidade que non expulse á xente á periferia e no que as persoas poidan moverse libremente pola mesma, sendo o elemento principal da pirámide", sinalou o portavoz do BNG, Luís Seara.

Durante a comparecencia ante os medios, o tres grupos municipais confiaron en que lle resulte "sinxelo" ao grupo de goberno sumarse á proposta, a pesar de lembrar o feito de que en xaneiro de 2018 Democracia Ourensá abandonase a comisión de seguimento de 'Móvete por Ourense', despois de asegurar que era "unha pantomima creada polo grupo de goberno".


Con esta actuación conxunta, o tres grupos da oposición sentaron un precedente: "Sempre que haxa coincidencias reais, sen entrar a falar de posicionamento político, actuaremos conxuntamente". Na mesma liña, foron as declaracións de Luís Seara que afirmou que recibiron "" o mandato da cidadanía de "porse de acordo nas cuestións transcendentes para a cidade".

ESTACIÓN INTERMODAL

Preguntados pola súa postura ante o tema da estación intermodal, Luís Seara manifestou que o BNG o que pide é unha "paralización da actual estación intermodal". "Pensamos que existe unha oportunidade histórica para facer unha verdadeira estación intermodal porque esta que se está facendo non o é", destacou.

Os nacionalistas xa presentaron no pleno anterior unha moción na que instaban á Xunta de Galicia e ao Ministerio de Fomento a paralizar "de maneira inmediata" o proxecto da Estación do AVE a Ourense, procedendo a recuperar e executar o gañador do concurso de 2011.

Pola súa banda, os socialistas mantiveron a súa postura ante a "posibilidade dun cambio" de localización da estación de autobús, prevista á beira do centro de saúde. O PSOE aposta por trasladalo alén das vías a unha terreo propiedade de Adif no que "a intermodalidad seguiría garantida pola pasarela".

"Non cremos defendible que a conselleira de Infraestruturas e Mobilidade, Ethel Vázquez, diga que o vai a facer si ou si", sostivo Villarino. "A súa postura desvela unicamente unha preocupación electoral de cumprir coa campaña política do presidente da Xunta, Alberto Núñez Feijóo, de face ás próximas autonómica, sen atender ás necesidades da cidadanía", concluíu.

Moción conxunta da oposición de Ourense | Fonte: Europa Press