Adif afirma que as obras do AVE a Galicia "van en prazo" e "a todo ritmo"
Apela a ter unha visión "máis ampla" e "non localista" para impulsar o Corredor Atlántico,
- Pablo Casado usa o AVE que nunca trouxo o PP a Galicia como arma política contra o PSOE
- Marta González acusa de "deslealdade" a Galicia ao Goberno de Sánchez e lamenta "o atraso" do AVE
Por Europa Press / Redacción | A CORUÑA | 06/11/2019 | Actualizada ás 14:58
A presidenta de Adif, Isabel Pardo de Vera, defendeu que as obras do AVE a Galicia "van en prazo" e cos traballos "a todo ritmo", ao ser preguntada polas manifestacións do presidente da Xunta, Alberto Núñez Feijóo, nas que puxo en dúbida os prazos fixados polo Goberno en funcións, que fixou para principios de 2020 o inicio das probas nesta infraestrutura.
Antes de asistir á xornada 'Situación actual da Alta Velocidade en Galicia', e a preguntas dos xornalistas, a presidenta de Adif manifestou comprender "a incerteza da xente e o cidadán normal sobre o que se está falando", pero considerou "acabado" o debate entre administracións a este respecto.
"Trabállase a todo ritmo e as obras van en prazo, falando deste tipo de obras", apuntou en alusión á complexidade das mesmas. Pardo de Vera defendeu que "nunca foran a este ritmo", pero precisou que o que non se lle pode pedir "é se se acaba o 17 de xaneiro ou o 20 de febreiro", citou como exemplo e en referencia ao próximo ano.
Por outra banda, remarcou que "hai que ter en conta que esta liña se vai poñer coa última tecnoloxía de instalacións de sinalización e comunicacións", expuxo rexeitando que as probas pertinentes nunha actuación destas características "duren moito".
"Non é verdade, imos a unha media do resto de Europa onde se implantan estes sistemas tan avanzados, os prazos van ben e as probas ata Pedralba están a ir moi ben", apostilou a este respecto. "En canto acabemos a obra, empezaremos a facer todas as probas e logo non podo dicir os meses que van durar", admitiu en referencia á duración das mesmas.
CORREDOR ATLÁNTICO
Noutra orde de cousas, preguntada polas denuncias dos empresarios sobre a falta de avances por parte do Ministerio de Fomento no Corredor Atlántico, defendeu que se está "avanzando".
Con todo, insistiu en que esta actuación "non é só unha infraestrutura", senón que, ao seu xuízo, esixe tamén a implicación do sector empresarial e das administracións para darlle "impulso". Por iso, apelou a ter "unha visión máis ampla e non tan localista para garantir o éxito deste Corredor".
CONEXIÓN A PUNTA LANGOSTEIRA
Por outra banda, sobre a conexión ferroviaria ao Porto Exterior da Coruña, recalcou que Adif colaborou no proxecto construtivo, pero apostilou que falta "un compromiso asinado respecto do financiamento". "Que lle corresponde a Portos do Estado e a Autoridade Portuaria", engadiu, incidindo, no entanto, en que Adif "non concibe" que non haxa esa conexión.
En canto á estación intermodal da Coruña, lembrou que o proxecto construtivo está "feito" e que se aprobou no consello de administración de Adif polo que está pendente de pasar, segundo explicou, polo Consello de Ministros. "Témolo claro na planificación, hai que executalo", dixo sobre esta obra.
Estas declaracións realizounas antes de participar nunha xornada organizada polo Colexio de Enxeñeiros de Camiños, Canais e Portos de Galicia, que contou tamén coa asistencia do delegado do Goberno en Galicia, Javier Losada.
