Por Xosé Antonio Pena | Santiago de Compostela | 04/10/2020 | Actualizada ás 11:00
*Buscarse a vida: velaquí unha desas expresións tan e tan introducidas en moitas persoas galegofalantes que xa nin se detecta como espuria, inda que a súa estrutura sintáctica claramente nos amosa que é así, na medida en que o galego –ao menos, o galego tradicional– rexeita as construcións reflexivas indirectas (véxase, ó respecto, a nota 1 do artigo ¡Vaites + substantivo!” ou “¡Vaia + substantivo!”, en troques de “¡Menudo/a + substantivo!, na que se explica un pouco este fenómeno lingüístico).
E é que, en realidade, non temos falta ningunha de acudir ó calco do castelán para dar conta das dúas significacións que presenta a dita expresión, xa que temos secuencias expresivas de noso que cobren eses significados, como imos ver neste e mais no vindeiro artigo.
Buscarse la vida
{= Buscar alguén os medios para subsistir ou para asegurar a súa subsistencia nun futuro, e mesmo tamén planear a vida segundo a súa propia conveniencia ou interese.}
Buscar por vida
Facer por vida
Facer pola vida
Mirar por vida
[E MESMO TAMÉN]:
Buscar a vida
Ex.: A los quince años tuvo que emigrar a Alemania a buscarse la vida.
Ós quince anos tivo que emigrar a Alemaña a buscar por vida ‡ a facer por vida ‡ a facer pola vida ‡ a mirar por vida.
● E tamén, en bastantes contextos:
Ganarse la vida
Ganar # Gañar a vida
NOTAS:
1. Cómpre indicar que en castelán tamén son correctas, e presentando este mesmo significado, as expresións buscar la vida e ganar la vida, tal e como reflexa o Diccionario de la Real Academia Española (DRAE), inda que probablemente sexan menos usadas –cando menos no castelán de España– cás correspondentes expresións coa reflexiva indirecta.
2. As expresións galegas están tiradas das seguintes fontes:
- Recolleita propia da oralidade galega.
- Recolleita propia documental (artigos de prensa, artigos ou comentarios na Rede, obras escritas, folletos publicitarios, etc.).
- Real Academia Galega: Dicionario da Real Academia Galega (versión en liña).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.