Por Europa Press / Redacción | SANTIAGO DE COMPOSTELA | 12/11/2020 | Actualizada ás 21:09
Diñeiro aos medios de comunicación para potenciar o turismo. Esa é a estratexia da Xunta. Unha estratexia que custará case oito millóns de euros que serán repartidos entre os medios tradicionais e que servirán para manter a súa precaria economía en tempo de Covid. Un xeito de vender publicidade institucional ou propaganda para que estes medios sigan falando ben do Goberno galego e da xestión de Feijóo.
Esta nova estratexia farase a través "dunha gran campaña de promoción para potenciar" o Xacobeo de 2021 e, segundo o presidente galego, "apoiar o sector turístico galego". Unha iniciativa que se enmarca dentro das medidas impulsadas para axudar a un dos sectores que máis sufriron o impacto da crise, o turismo, e de paso, outro que o está pasando moi mal, os medios de comunicación.
Así, o Consello da Xunta aprobou o expediente de gasto relativo a este proxecto, que ascende a 7,9 millóns de euros. O seu obxectivo principal será chegar a diferentes segmentos da poboación e atraer a visitantes para facilitar a reactivación do sector turístico no seu conxunto. O período de execución deste plan de promoción prolongarase durante 12 meses, entre o primeiro trimestre de 2021 e o de 2021.
En canto ao acordo marco, prevense, polo menos, "cinco campañas de impacto autonómico e nacional" centradas no Xacobeo de 2021; nas campañas de verán e outono do próximo ano, e na de primavera de 2022; así como unha campaña interna dirixida a concienciar sobre a necesidade de darlles unha boa acollida aos visitantes durante o Ano Santo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.