Feijóo reclama ao Goberno central a conexión ferroviaria ao porto exterior da Coruña
Avanza o inicio o próximo ano das obras de urbanización e saneamento da segunda fase do polígono de Morás, en Arteixo.
Por E.P. | A Coruña | 07/12/2020 | Actualizada ás 14:28
O presidente da Xunta de Galicia, Alberto Núñez Feijóo, reclamou ao Ministerio de Transportes, Mobilidade e Axenda Urbana a execución da conexión ferroviaria ao porto exterior da Coruña, coincidindo coa súa visita ao polígono de Morás, no municipio coruñés de Arteixo.
Feijóo considera que a demanda do Goberno galego está xustificada no protocolo subscrito pola Xunta co entón ministro de Fomento, Iñigo de la Serna, durante a etapa de goberno do PP. "Está asinado nos documentos e son de obrigado cumprimento", recalcou sobre un protocolo polo que a Xunta achegaba 20 millóns para os peiraos de Batería e Calvo Sotelo, mentres que se recollía o financiamento, con 140 millóns de euros por parte de Adif e Portos do Estado, da conexión ferroviaria.
Feijóo asegurou que esta actuación permitirá ao porto exterior ser "máis competitivo" e "non tirar máis de mil millóns de euros ao mar", dixo sobre o custo das obras.
Tamén apelou á importancia da mesma para un polígono como o de Morás, do que explicou que a Xunta adxudicou o proxecto de conexión exterior do saneamento e da urbanización da segunda fase, coa previsión de que ambas as actuacións poidan comezar en xaneiro do próximo ano.
"E tamén no próximo ano esperamos adxudicar a redacción do proxecto da fase C --a terceira--", engadiu na súa intervención, na que resaltou que, de todo o chan ofertado neste polígono, xa está adxudicado o 65%.
Feijóo precisou que se trata, en total, de 1,5 millóns de metros cadrados de superficie, cun investimento próximo aos 106 millóns e co obxectivo de converter este polígono no "pulmón empresarial máis importante da provincia da Coruña.
Ademais, na súa intervención, fixo un repaso das actuacións en distintos polígonos industriais de Galicia, ademais de apelar á "aposta" polo emprendemento por parte do Goberno galego."Cun investimento de oito millóns nos orzamentos de 2021 para bonificar a adquisición de chan industrial", citou como dato.
Pola súa banda, o alcalde de Arteixo, Carlos Calvelo, agradeceu o apoio da Xunta e remarcou a importancia dunha actuación como a de Morás para "crear riqueza e postos de traballo".
