Galicia volve as cifras de mortes por accidentes anteriores á pandemia a pesar dos peches perimetrais
Pecha marzo con 10 falecidos en estradas fronte aos 3 do mesmo mes de 2020, inicio do confinamento.
Por Europa Press / Redacción | Compostela | 05/04/2021 | Actualizada ás 10:02
Galicia pechou o pasado mes de marzo cun total de 10 vítimas en accidentes de tráfico, fronte aos tres rexistradas no mesmo mes do 2020, no que comezou o confinamento pola pandemia do coronavirus. Trátase dun incremento de máis do triplo.
Esta decena de mortos que deixaron as estradas galegas en marzo producíronse nun total de oito sinistros, mentres que o ano pasado foron tres. De feito, marzo é o primeiro mes deste 2021 que supera en número de accidentes mortais ao seu antecesor en 2020.
Segundo datos que recolle este luns nun comunicado a Dirección Xeral de Tráfico (DGT), destes oito accidentes, dous foron colisións, dous atropelos, dous envorques e dous responden a outras tipoloxías. Ademais, catro de todos estes sucesos producíronse por unha saída da vía.
En canto ás idades das vítimas, catro dun total de 10 tiñan entre 35 e 44 anos. Así mesmo, dous dos falecidos tiñan entre 0 e 14 anos, concretamente os dous menores que perderon a vida en Salceda o día 19 de marzo. O cadro complétase con dous mortos de 65 ou máis anos, cunha vítima na franxa de 25 a 34 e con outra de 45 a 54 anos.
No que vai de 2021, as estradas galegas cobráronse a vida dun total de 16 persoas, fronte ás 14 do mesmo período de 2020.
14 ACCIDENTES MORTAIS EN 2021
O incremento na sinistralidade mortal durante o pasado mes de marzo tamén se constata con respecto aos dous primeiros meses deste ano. E é que xaneiro concluíu con só dous accidentes con falecidos e febreiro, con catro. Sumados aos oito de marzo, fan un total de 14 en 2021, fronte aos 13 do mesmo período de 2020.
Por provincias, a que rexistrou máis sinistros mortais en marzo foi A Coruña, con seis. Lugo e Pontevedra notificaron un cada unha, mentres que en Ourense non houbo ningún.
No que vai de 2021, a metade dos accidentes de tráfico --sete de 14-- con falecidos tiveron lugar na Coruña, seguida de Ourense co 21,4% --tres sinistros--. Á cola sitúanse Lugo e Pontevedra, cun 14,3% cada unha --dous accidentes--.
