Convocada unha nova manifestación contra a universidade privada de Abanca

Convocada unha nova mobilización para protestar contra o avance legal da nova universidade privada de Abanca. A Plataforma en Defensa da Universidade Pública chama a participar “masivamente” na protesta marcada para as 12:00 horas do vindeiro sábado 12 de xuño en Santiago de Compostela, mesmo escenario da desenvolta unhas xornadas atrás.

A mobilización partirá do parque da Alameda para demandar a paralización deste proxecto que, ata o momento, sae adiante tan só cos votos a favor do PP e que, a ollos da CIG --unha das entidade que conforma a plataforma-- vén “promovida” polo propio goberno da Xunta, á que acusan de pretender “implantar un modelo de ensino superior privado no noso país”.

“A CIG rexeita este intento do PP de privatizar a universidade convertendo as ensinanzas superiores nun suculento negocio para que entidades financeiras como a de Escotet se lucren co mercadeo das titulacións universitarias”, censuran. Neste aspecto cargan contra a Xunta por conceder esa “licenza universitaria” que “lle vai dar a posibilidade de enriquecerse e de segregar a parte do alumnado da universidade pública, nomeadamente a aquel que teña máis recursos ou o que, como no modelo estadounidense, se endebede de por vida”.

Dende a Confederación advirten tamén do “enorme problema” que isto provocará para o futuro da universidade pública, tanto para o seu financiamento, pola perda de alumnado e de investimento privado, como pola posible perda de titulacións. Por iso anima a “toda a sociedade” galega a mostrar o seu apoio á universidade pública e o rexeitamento á privatización acudindo á manifestación.