Abanca facilitará o acceso a créditos para o sector da pesca e do marisqueo do norte de Pontevedra

Abanca facilitará o acceso a vías de crédito e asesorá en materia financeira a varias entidades do sector pesqueiro do norte da provincia de Pontevedra coas que a entidade financeira pechou un acordo.

En concreto, Abanca asinou este martes un convenio de colaboración conn catorce confrarías de pescadores, a lonxa de Campelo e Parquistas de Carril; coas que pretende "impulsar" o sector pesqueiro e marisqueiro do norte pontevedrés.

O acordo foi subscrito nun encontro telemático no que participou a directora territorial de Abanca en Pontevedra, Carmen Fernández, xunto con representantes das entidades que participan no convenio.

A través deste acordo, os profesionais poderán acceder "a condicións melloradas na contratación" de produtos da entidade financeira para así pór en marcha novos proxectos e mellorar a súa produtividade.

Diso informa Abanca nun comunicado no que tamén resalta que os beneficiarios terán á súa disposición outras ferramentas financeiras para fomentar "a sustentabilidade" do sector marítimo.

Ademais, produtores, mariscadores, pescadores e vendedores recibirán asesoramento grazas aos seguros personalizados que ofrece Abanca Mar, que se encargará de achegarlles as súas opcións de financiamento a través dos convenios que o banco mantén coas administracións.

COMERCIO DE OURENSE

Por outra banda, tamén este mércores, Abanca e a Federación de Comercio de Ourense asinaron outro acordo de colaboración para levar a cabo actividades formativas dirixidas ao sector e promocionar o comercio local no proceso de desescalda que se abre na actualidade.

En concreto, o acordo contempla a definición dun calendario para a organización de xornadas e conferencias de carácter formativo, así como a articulación de "solucións financeiras" para o colectivo.

Firma do acordo entre Abanca e o colectivo de pescadores e marisqueiros do norte de Pontevedra. ABANCA | Fonte: Europa Press