Gonzalo Caballero destaca a "boa sintonía" con Ferraz a dúas semanas das primarias do PSdeG

O secretario xeral do PSdeG, Gonzalo Caballero, reivindicou a representación galega tanto no Comité Federal como na Executiva do PSOE tras o Congreso de Valencia, á vez que destacou a súa "boa sintonía" coa dirección de Pedro Sánchez.

En concreto, os socialistas galegos contarán cun posto na Executiva a través da secretaria de Exterior, Pilar Cancela, mentres que na renovación parcial do Comité Federal entraron os presidentes das deputacións de Pontevedra e Lugo, Carmela Silva e José Tomé; da alcaldesa da Coruña, Inés Rey; e dos deputados autonómicos Pablo Arangüena e Mariña Ortega. A eles hai que sumar ao alcalde de Vigo, Abel Caballero, na súa condición de presidente da Federación Española de Municipios e Provincias (FEMP).

Estas incorporacións, segundo informa o PSdeG, débense a unha "reunión" entre Caballero e Sánchez na que abordaron "a estrutura de representación" da federación galega nos órganos do PSOE. De feito, agradeceu que se incluísen "o catro nomees propostos pola dirección nacional do PSdeG, un por cada provincia", así como unha quinta persoa "a maiores".

FORMOSO FALA DE "UNIDADE"

O secretario provincial coruñés e candidato á Secretaría Xeral do PSdeG Valentín González Formoso destacou a "unidade" coa que sae o PSOE do Congreso Federal de Valencia celebrado este fin de semana. "Este foi o Congreso da unidade, da reafirmación dun partido que é consciente de que os grandes avances deste país conseguíronse cando o PSOE estivo motivado e estivo unido, e ese é o modelo que nós queremos para o PSdeG", expresou Formoso.

O tamén presidente da Deputación da Coruña referiuse así á "unidade" do PSOE estatal con ese apuntamento ao estado da estrutura galega, que nestes momentos espera expectante ás primarias que se celebrarán o vindeiro 30 de outubro. Formoso competirá co actual Secretario Xeral, Gonzalo Caballero, para disputarlle o liderado do Partido Socialista de Galicia.