Por Europa Press / Redacción | SANTIAGO DE COMPOSTELA | 29/01/2022 | Actualizada ás 14:14
O secretario xeral do PPdeG, Miguel Tellado, reivindicou este sábado "escoitar aos pequenos municipios" para poder trasladar ao Goberno central "a necesidade de financiar os servizos en función do custo real da prestación", así como da dispersión poboacional "nunha Galicia que ten a metade de núcleos de poboación de España".
Tellado expresábase así esta mañá tras a constitución da Comisión de pequenos concellos do PPdeG, presidida pola alcaldesa de Larouco, Patricia Lamela. A comisión nace, segundo explican nun comunicado, con "a vocación de escoitar en primeira persoa as necesidades reais dos municipios da Galicia menos poboada".
"Será o nexo entre o partido e os nosos alcaldes nestes municipios", sinalou Tellado, que remarcou o momento no que aparece esta iniciativa, dado que o Goberno central quere negociar coas Autonomías o novo modelo de financiamento autonómico, "no que se deben ter en conta variables determinantes para Galicia".
Unha das grandes prioridades do Executivo autonómico, segundo afirmou o secretario xeral, é "garantir a igualdade de oportunidades para calquera persoa, resisa onde resida, posibilitando o acceso aos mesmos servizos e permitindo que gocen dos mesmos dereitos".
Por último, Tellado defendeu o traballo dos alcaldes "que fan política nos concellos pequenos, xente que traballa a pé do territorio". "Fronte aos partidos que se instalan na demagoxia, gobernamos na maioría dos pequenos municipios de Galicia, e por algo será", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.