Movemento Veciñal de Touro pide que a empresa TEN "cese a actividade" na antiga mina
O grupo avanzou que o vindeiro martes se celebrará un pleno extraordinario para tratar "a situación ilegal da empresa" e as molestias que, ao seu xuízo, "sofren os veciños".
Por Europa Press / Redacción | SANTIAGO DE COMPOSTELA | 29/05/2022 | Actualizada ás 16:00
O Movemento Veciñal de Touro pediu ao concello que "cumpra a lei" e se notifique á empresa que opera nos antigos terreos da mina da localidade con lodos de depuradora e outros residuos, Tratamentos Ecolóxicos do Noroeste (TEN), que debe "cesar a actividade" nesta localización.
Para iso, Movemento Veciñal --que conta con representación na corporación-- avanzou que o vindeiro martes se celebrará un pleno extraordinario para tratar "a situación ilegal da empresa" e as molestias que, ao seu xuízo, "sofren os veciños". Nun comunicado remitido aos medios, explicou que TEN "ten aberto expediente de reposición da legalidade urbanística pola falta de licenzas nas súas instalacións".
Ademais, detallou que este expediente foi aberto o pasado mes de marzo por mor das inspeccións urbanísticas derivadas do pleno extraordinario celebrado no consistorio en novembro de 2021. Ante esta situación, o Movemento censurou que, conforme á Lei do Chan, o concello debería ordenar o cesamento da actividade nas instalacións "en situación de ilegalidade urbanística".
A pesar disto, denunciou que o alcalde da localidade, Ignacio Codesido, "trata de esquivar a lei ao non notificar o cesamento da actividade". Unha situación que, sinalan, a empresa "aproveita para seguir funcionando con normalidade" coas "consecuentes molestias" que, aseguran, "causa aos veciños". O pleno, convocado a instancia do Movemento Veciñal de Touro, celebrarase o martes día 31 ás 13,30 na Casa da Cultura da localidade.
